October 28, Thawhlehni zan khan English Carabao Cup last 16 khelh chhunzawm a ni a, Brentford in awlsam taka hnehna changin quarter-final an lut. Brentford rual hian Fulham pawhin harsa taka hnehna changin quarter-final an lut ve bawk.
Inrinni zanah Liverpool an hneh vanga phur leh inrintawk thar tak Brentford hi League 2 lamah parukna ni mek Grimsby Town hmachhawn turin Blundell Park-ah an leng lut An len luhna mualah an khel tha viau a, 5-0 ngawtin hnehna an chang.
EPL club Brentford tan hian Mathias Jensen chuan minute 22-naah hmahruaina goal a thun. He goal hian mikhual team Brentford a fuih phur viau a, na zawkin an khingpuite an nawr zui nghal a, goal dang pawh an thun belh leh thuai. Hmahruaina goal an thun atanga minute li hnu lekah Keane Lewis-Potter chuan an goal hnihna a thun zui leh a, an hmahruaina a tizau. Inhnaihchilh taka goal hnih an thun zawn hnu hian Reiss Nelson chuan chawlhlawk dawn hnaih minute 43-naah an goal thumna a thun belh zui leh a, 3-0 a hmahruai chungin chawlhlawk an hmang.
Chawlhlawk hnu lamah Brentford an khel tha chhunzawm a, goal pawh an thun belh leh thuai. Insiamthat mamawh Grimsby Town an insiamtha hlei thei lova, penalty an chawi zui leh. Minute 54-na leka penalty an hmuh chu Fábio Carvalho chuan a pet goal a, an goal lina a thun. Si li faia hma an hruai hnu hian Nathan Collins chuan minute 75-naah an goal ngana a thun belh zui leh a, Mimualah 5-0 ngawta hnehna changin quarter-final an inhlangkai zui ta a ni.
Brentford in awlsam taka hnehna an chan lai hian EPL club dang Fulham erawh chu League One-ah 17-na ni mek Wycombe Wanderers lakah an mualpho teuh hle a, an si phurh an sut hnuin penalty shoot-out-ah hnehna an chang thei hram a, harsa takin quarter-final an lut thei hram.
Wycombe Wanderers hian an mikhual Fulham lakah bul an tan tha viau a, Cauley Woodrow chuan inkhel tan atanga minute lina lekah hmahruaina goal a thun nghal. Hma taka goal an chhuah hi Fulham in an sut lawk thei lova, hnufual zawk ni chungin chawlhlawk an hmang.
Chawlhlawk hnu lamah Fulham in bul an tan tha a, goal pawh a thun thuai. Second half tan atanga minute thumna lekah Josh King chuan goal thunin an si phurh a sut ta nge nge. Goal khat ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Goal thun tum ngawrh dun viau mah se goal thun belh thei an awm tawh lova, 1-1 a inhnehtawk in hun pum an hmang.
Hun pangngaiah chak zawk an awm thih loh hnuin penalty shoot-out hmangin chak zawk zawn chhunzawm a ni a, Fulham in 5-4 a hnehna chang hramin quarter-final an inhlangkai zui ta a ni.
Brentford in quarter-final an lut
