Thawhleh zan khan English Caraboa Cup last 16 khelh tan a ni a, EPL club pahnih Southampton leh Brentford ten hnehna changin quarter-final an lut.
EPL table mawngphaha awm mek Southampton hian St. Mary’s Stadium-ah championship club Stoke City an mikhual a. Goal nga ngawt luhna inkhelah 3-2 a hnehna chang hramin quarter-final an inhlangkai.
Saints hian an mikhual Stoke lakah bul an tan tha a, chawlhlawk hmain goal hnih an thun hman. Inkhel tan atanga minute 19-naah Taylor Harwood-Bellis chuan hmahruaina goal a thun. Hma takah goal an thun hnuin an vannei zui leh thuai a, chawlhlawk hmain penalty an hmu. Minute 35-naa an penalty hmuh chu Adam Armstrong chuan an pet goal a, an hmahruaina a tizau. Goal hnih an chhuah zawn hnuin Stoke City an insiamtha a, chawlhlawk dawn hnaih minute 45-naah Ashley Phillips chuan goal thunin an si phurh a sut then a. 2-1 a hnufual chungin chawlhlawk an hmang.
Chawlhlawk hnu lamah Stoke City in bul an tan tha ve thung a, goal pawh an thun thuai. Minute 54-na lekah Thomas Cannon chuan goal thunin an si phurh a sut zo. Goal hnih ve ve an thun hnuin inkhel a hmuhnawm zui viau a, goal thun tumin tan an khawh nasa dun viau bawk. Hun rei tak goal a luh belh theih loh hnuin hun tawp dawn hnaihah mualneitu team an vannei ta nge nge. Minute 88-naah PenJames Bree chuan goal pawimawh tak a thun a. Bree goal thun hmang hian Southampton chuan hnehna hlu tak an chang a, quarter-final an inhlangkai zui ta a ni.
Thawhleh zana inkhel dangah EPL ah pakuanaa awm mek Brentdford chu an mikhual Sheffield Wednesday lakah harsa takin an chak hram a, quarter-final an inhlangkai ve bawk.
Brentford hian an mikhual Sheffield Wednesday lakah bul an tan tha viau a, inkhel tan atanga minute 11-na lekah Kevin Schade chuan hmahruaina goal a thun nghal. Hma takah goal thun mah se goal dang an thun belh thei tawh tlat lo thung. Mualneitu lamain goal an thun belh theih loh reng hnuin mikhual team tan Djeidi Gassama chuan minute 57-naah goal thunin an si phurh a sut. Djeidi Gassama goal thun hnu hian goal dang a luh belh thei tawh lova, penalty shoot-out hmanga thelh an ngai.
Penalty shoot-out ah hian Brentford tana pettu ten an pet goal vek laiin Sheffield Wednesday tana pet hnuhnung ber Liam Palmer chuan a thelh tlat thung a, Brentford lakah uiawm takin an tlawm phah ta a ni.
Brentford in quarter-final an lut
