British Army Infantry Division-a awm mek, sergeant Isaac Vanrosanga leh corporal Lalremtluanga Ralte te chuan Nilaini khan Mizoram Youth Commission chairman Malsawmzuala Ralte hoin chief minister Lalduhoma an kawm.
Mizo tlangval British Army-a awmte nen hian Mizo thalai tam zawkin British Army-a an luh theih dan tur an sawiho tih chief minister hian sawiin, a lut duh Mizo thalaite tana kawng buatsaih turin Mizoram Youth Commission chuan hma lo la se an ti a. An dilna leh an visa buaipui sak bakah interview hmachhawn thei khawpa tling leh tlakte chu an kalna tur sum, awlsam taka loan an lak theihna tur thlenga buaipui sak tha an tih thu sawi a ni.
British Army-a awmte hian an training laiin chhiah pek vek hnuah India pawisa nuai 1.6 vel an hlawh a, an training chhungin an kalna senso awlsam takin an rul vek thei niin an sawi.
Tunah hian Mizo thalai 29 British Army-ah hian an awm mek a. An ni ho nena tangtlangin MYC kaltlangin Mizoram sawrkar chuan thalai tam zawk British Army-a luhtir an tum dawn tih sawi a ni. Thalai, hetiang lama tuiten MYC hmalakna ngaichang tura chah an ni.
Qualification hi class 12 a ni a, online cognitive test an neih hnuah an kohte chuan english, maths, medical, physical leh interview an hmachhawn a ngai a. San zawng leh rih zawngah bithliah a awm loa, body mass index hmangin an teh thung. Tuna Mizo thalai British sipaia tang mekte hian, exam tura kohte chu, an hriselnain a zir phawt chuan an tlin ngeina tura lo kaihhruai an inhuam tih an sawi a ni.
British Army-a thalai tam zawk luh theih dan tur CM hoin sawi
