Mizoram tlawha lo zin Border Roads director general (DG) Lt Gen Raghu Srinivasan chuan Nilaini khan larsap Dr Hari Babu Kambhampati chu Raj Bhavan-ah a hmu a. Mizorama ramri hrula kawngpui siam kawnga Border Roads Organisation (BRO) hmalak tawhte sawipuiin, kawngpui siam hna thawh meka hmasawnna leh hmachhawp awm mek an sawi dun.
Border Roads DG kaihhruainaa BRO-in ramri hrul leh hmun kilkhawra kawngpui pawimawh tak tak siam kawnga hma an laknaah larsap hian lawmthu a hrilh a. Ramri hung leh enkawlna kawnga thil pawimawh a sawipui. BRO DG chuan tlangram chhengchhe tak taka hna thawka kawng siam thin an ni a, hengah hian lei dawh bakah lei verh hautak tak tak pawh a tel tih sawiin, Mizoramin a mamawh phawt chuan heng an thiamna leh an tawnhriat hi chhawr tangkai theih reng a ni tih a sawi a ni.
Ningani khan Lt Gen Raghu Srinivasan hian Champhai a tlawh a. District bawrhsap James Lalrinchhana’n lo dawngsawngin district chhunga BRTF hmalakna a sawipui a, mamawh a lo thlen.
BRO DG chuan kum 1960 chho atangin Mizoramah BRTF-in kawngpui siamin project hrang hrang an thawk tan a, buaina liantham tawk loa tun thlenga hna thawh a ni chu lawmawm a tih thu a sawi. Mizoramah theihtawp chhuaha hma an lak thu leh mi leh sa pawh hmun hrang hrangah an neih thu sawiin, an hmalakna khawtlang mipuiin tha taka thlawpa tawiawm turin a sawm a ni.
Bawrhsap chuan tha taka ramri hnaih inkalpawhna kawngpui border road enkawl a ni chu lawmawm a tih thu sawiin, district mipuiin tangkai taka an hman thu a sawi. BRTF hnuaia siam tur Zokhawthar to New Hruaikawn kawng leh Tualcheng to Pamchung kawng siam dan tur a sawipui a. Zokhawthar to New Hruaikawn kawngpui siam turah Old Hruaikawn a thleng lo tih thlenin, Old Hruaikawn thlenga kawng siamsak turin a ngen a; Old Hruaikawn thlenga kawng siam a nih tur thu bawrhsap hi a hrilh.
Hemi hnu hian Lt Gen Raghu Srinivasan hian Zokhawthar tlawhin Assam Rifles hmunhma leh pawimawh dangte a en a ni.
BRO hotupa leh larsap-in state ramri bul kawng siam sawidun
