Bruno Mars-a’n Billboard Hot 100-a No.1 kai thei hla 10 nei ta

Bruno Mars-a’n Billboard Hot 100-a No.1 kai thei hla 10 nei ta
Bruno Mars hla thar “I Just Might” chu Billboard Hot 100 (US singles) chart No.1-ah a debut a, he chart-a a hla No.1 kai thei 10-na a nih rualin, a hla he chart No.1 a debut thei hmasa ber a ni. Chart No.1-a debut tih chuan, chart-a a lan theihna hmasa bera No.1 ni nghal tihna a ni. Bruno Mars hi mipa solo artist zinga he chart No.1-a hla 10 chin nei thei palina niin, Drake, Michael Jackson leh Stevie Wonder te hnung a zui ve ta a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni. Bruno Mars “I Just Might” hian kar khat chhungin US-ah stream maktaduai 23.5, radio airplay ngaithlatu maktduai 32.6 leh sales 13,000 a nei thei a ni.
Bruno Mars hi Hot 100 chart-a No.1 kai thei hla ngahah 10-na a ni ta a, he chart-a No.1 kai thei hla ngah ber chu The Beatles (20) niin, Mariah Carey (19), Rihanna (14), Drake (13), Michael Jackson (13), Taylor Swift (13), Madonna (12), The Supremes (12), Whitney Houston (11), Janet Jackson (10), Stevie Wonder (10) leh Bruno Mars (10) ten an dawt.
He chart-a Mars hla hrang hrang No.1 kai tawh te No.1 hun chhung belhkhawm chu kar 40 a tling ta chiah a, Hot 100 chart-a No.1 nih reiah pakuana a ni ta. He chart-a No.1 ni rei ber chu Mariah Carey niin, a hla hrang hrang No.1 hun chhung belhkhawm chu kar 101 a tling tawh a, Rihanna (60), The Beatles (59), Drake (56), Boyz II Men (50),m Usher (47), Beyonce (46), Taylor Swift (46) leh Bruno Mars (40) ten an dawt.
He chart-a kar 10 chhung No.1 ni thei Taylor Swift “The Fate of Ophelia” chu No.1 atangin No.2-ah a tawlh a, chart-a kar riat chhung No.1 ni thei HUNTRIX “Golden” chu No.3-ah bawk a la awm a, Olivia Dean “Man I Need” pawh No.4-ah bawk a la awm a, chart-a kar 10 chhung No.1 ni thei Alex Warren “Ordinary” chu No.2 atangin No.5-ah a tawlh ve thung.
Ella Langley “Choosin’ Texas” chu No.5 atangin No.6-ah a tawlh a, Djo “Eng of Beginning” chu No.6 atangin No.7-a a tawlh a, sombr “Back to Friends” chu No.8-ah bawk awm lehin, Kehlani “Folded” chu No.7 atangin No.9-ah a tawlh a, Taylor Swift “Opalite” chu No.9 atangin No.10-ah a tawlh ta bawk.