BTS-in Mexico Presidential balcony atangin fans chibai an buk

BTS-in Mexico Presidential balcony atangin fans chibai an buk
K-pop group BTS te chu an kalna lam apiangah khualtha anga cheibawl an ni zel tawh a, an tour neih mekah Mexico an thleng ta a, Mexico-ah hian an ram President Claudia Sheinbaum-i’n a chenna, National Palace-a lengah a lo sawm a, hetah hian BTS ten President bathlar atangin Zocalo square-a an mahni hmuchaka pungkhawm, fans 50,000 rual te chibai an buk an ni.
Zocalo square hi Mexico a kawtthler lar ber niin, South Korean band te hian Claudia Sheinbaum an hmuh hnuah president bathlar-ah hian chhuakin, Spanish leh English-in an fans, ARMY, an tih te chu chibai bukin an inlan ta a ni. Fans lam hi kawttler-ah hian darkar tam tak BTS inlan hun tur nghakin an pungkhawm a ni. BTS hian ARIRANG tour an neih mekah Mexico-ah hian Estadio GNP Seguros-ah concert vawi thum an nei dawn a ni.
Presidential balcony-ah hian BTS member-te hi minute 5 tha awrh chauh an inlan a, mahse, an fans, an hmel leh chevel a taka hmuh chak pungkhawm te tan an duhthusam tihpuitlinna a ni a. RM chu microphone chang hmasa ber niin, Spanish leh English chawhpawlhin, “In zinga kan rawn tel theih avangin kan lawm e. Naktuka stage-a concert hun tur kan nghakhlel tawh hle mai. Hlim takin hun kan hmango dawn nia! Te amo. Te quiero, Muchas gracias,” a ti.
V pawhin, “Hello. Spanish hi ka thiam vak lo a, mahse, kan ti ve hrim hrim ang e. Ka ngai hle mai che u. Mexico kan ngai hman takzet a ni. Kan boruak hi a turu a ni. Min duhsak avangin kan lawm takzet e. Kan inhmuh leh theuh dawn nia. Mangtha ule” tiin a phone a Spanish thuziak a chhiar ve thung.
Constitution Plaza (Zocalo official name) a mipui pungkhawm chu BTS pawhin hmuhnawm an tih tur khawpa tam an ni a, group member te hi beige leh navy-blue suit nen an induang zaih hlawm a, an phone camera hmangin an fans pungkhawm te thla hi an la ve nasa hle a ni.
Mexico President Sheinbaum chuan mipui tana thuchhuah a siamah “Nakkumah rawn kal leh ngei turin ka lo sawm tawh a ni,” a ti a, fans lamin Zocalo-a BTS free concert an beiseina a tisang hle a, a hnu lawkah Mexican president hian a social media-ah BTS member te nena an thlalak post-in, “Mexico thalai tam berin an duhrawn BTS te lawm takin ka lo welcome e. Music leh kan ngaihhlut ten Mexico leh South Korea min thlunzawm a ni,” a ti.
BTS ian GNP Seguros Stadium-ah concert vawi thum, May ni 7, May ni 9 leh May 10-ah an nei dawn a, ticket zawng zawng hi an zawrh chhuah atanga darkar khat chhungin an hralh zo vek a, promoter Ocesa chuan ticket hi zan thum concert atan 1,36,000 an hralh niin an tarlang.
Sheinbaum hian ARMY Mexico ten BTS concert ticket an inchan lo nasa tih hriain, South Korean President, Lee Jae Myung chu lehkha thawnin, Mexico-a BTS concert tam zawk neih theihna tur kawng zawn sak tura a ngen thu a lo puang taw a. South Korean sorkar pawhin Mexico President ngenna hi BTS enkawltu company HYBE an hriattir tawh tih an puang ve leh bawk a ni.