Mizoram leh Assam ramri chu buaina a awm kher ngai loa chinfel dan kawng zawn tum a ni tih chief minister Lalduhoma chuan a sawi a. Sairang atanga Hmawngbuchhuah thlenga rel kawng siam tumah Mizoram mipui ngaihdan lak hmasak a duh avangin hma la rih lo turin a ngen tih a sawi bawk. Tunhnaia Guwahati leh New Delhi-a a zinnaa ami kawmte chungchang sawiin chief minister chuan, Guwahati-ah Assam chief minister Himanta Biswa Sarma nen an inkawm a, ramria buaina an sawifel hma chuan a tu lam ve ve pawhin ramri ah buaina siam loa a ngai anga kal nise, buaina chhuak a awm palh pawhin tih reh thuai nise, an tih thu a sawi.
Ramri a buai chauha sawi loin, buai loh laia inbiak tha an ti a. Assam hi Assembly Session an neih lai a nih avangin inbiakna hi February thla tawp emaw March thla tir lamah emaw neih nise, an ti. Assam CM hian state pahnih inbiaknaa lo kaihruai tawh thin Border Development minister Atul Bora a rawn kaltir dawn tih a sawi a. Meghalaya nena ramri an insiamrem dan kalphung ang emawa insiamrem dan dap tul a tih thu Himanta hian a sawi a. Thenawm state-te nena buaina nei loa insiamrem an tum tih a lo hrilh thu a sawi bawk.
“Ramri hrula mipui awmte hian buai tawh loh dan ringawt an ngaituah a, buai lo tura insiamremna hi hmanhmawh takin kalpui tum a ni,” Lalduhoma hian a ti.
Union Railway minister Ashwini Vaishnaw nen an inkawmnaah Sairang thleng kal turin rel kawng peihfel tep a ni tawh a. Sairang atanga Hmawngbuchhuah (Lawngtlai district) thlenga kal tura ruahmanna awm leh chu an sawidun tih sawiin, “Hemi ah hian min lo ngaichang turin ka ngen a, Mizoram mipui ngaihdan lak hmasak ka duh thu ka thlen a ni. Tun atanga rei vak loah NGO te pawh Sairang atanga Hmawngbuchhuah thleng rel kawng neih kan duh nge duh loh tih ngaihdan kan la anga, ngaihdan tam zawk angin kan kal mai ang. Rel kawng neih kan duh chuan min tihsak rang turin kan ngen anga, kan duh loh chuan sial lo turin kan ti dawn a ni,” a ti.
CM zin report leh a kaihhnawh:
8 Aizawl by pass road sialna tur cheng vaibelchhe 500 bakah national higway four lane Kawnpui atanga Sairang inkar tur vbch 1742.11 rawn sanction leh bawk.
8 Union Tribal Affairs minister John Barla a hmuhnaah, sawrkar kum kal mek tawp hma ngeiin sum tlem azawng an la neih hman tangkaina tur, an ngaihpawimawh zual project thehlut turin a lo hrilh a. Project engemawzat an thehluh zingah Vanapa Hall sakthatna turcheng vaibelchhe 37 dilna a tel. A aia tam pawh pawisa hi dah theih a nih laiin, hei aia tama sakthat ngaihna engineer-ten an hre lo.
8 Minister of state (finance) Dr Bhagwad Karad an hmuhnaah Mizoram Rural Bank-a thawk ho chu regional rural bank danga thawktute aiin an hlawh a tlem zawk a, heng ho hlawh ang zat hlawh tir ve turin a ngen. MRB-a hna lak danah Mizote tan special recruitment exam siamsak turin a dil bawk. Union MoS hian bawhzui sak a tiam.
8 ZPM manifesto-a an dah, Mizoram Development Bank din chu rang taka tihfel an inbeisei ngam loh laiin, an beisei aia hma, rei lutuk nghah ngai loa an neih theih mai an inring tih a sawi.