Buai vanga nunna chan mi 87-te vui liam

Manipur-a Zo hnahthlakte leh Meite intihbuai
vanga nunna chan, Zo hnahthlak lam, mi 87-te vui liam an ni a, mittui nen mipuiin an thlah a ni.
Hnam pahnih intihbuai vanga nunna chan mi engemaw zatte ruang chu a lehlamte awmna lamah a awm zui a, Zo hnahthlak, Meitei zinga awma nunna chante chu Meitei awmna lamah, Meitei, Zo hnahthlakte awmna lama nunna chante chu Zo hnahthlakte awmna lamah dah zui a ni. December ni 14 leh ni 15-ah union home ministry hmalaknain ruang hi inpek tawn a ni a, Imphal-a an dah Zo hnahthlakte ruang, Churachandpur district mite chu Nilaini khan vui liam an ni.
Inphal atangin Lamka-ah ruang 41 phurh thlen a nih bakah Lamka-ah hian buai vanga nunna chan mi 46-te ruang a awm sa bawk a, chung mi, mi 87-te ruang chu December ni 20-ah vui liam an ni.
Lamka atanga Mata khua, km 4 vela hlaah an thlan tur laih niin, chutah chuan phum a ni a, an phumna hmun hi Mata khaw chhung atangin km 2 vel a ni.
Lamka atanga thu dawn danin, Lamka atanga Mata thleng hian traffic a jam tluan a, thlana kal tum mi engemaw zat an kir leh.
Nilaini-a vui liamte zingah hian nause an awm a, kum upa leh tar pawh an awm a, kum 87 mi pawh a awm.
Thlan hi excavator (JCB) hmanga laih an duh lo a, Zo hnahthlakte thlan laih dan pangngaiin, thalaiin thlan 87 an lai a ni. Manipur-a Zo hnahthlakte hi ruang awm laiin an inral thin a, an inphumna hmunah hian inral dan tur buatsaihin, chutah chuan ral duhte’n ralna an pe.
Lamka-a Peace Ground-ah anmahni thlahna hun hman phawt a ni a, Pastor te’n hun an hman bakah Zo United leh Indegenous Tribal Leaders Forum aiawh te’n thu an sawi a, Mizoram atanga kal Central YMA president Lalhmachhuana’n thu a sawi bawk.
Lamka atanga thu dawn danin, mipui sing li chuang an pungkhawm a, naupang atanga kum upa thlengin an tel.