State budget-a lirthei leina tura loan dah sa hmangin car thar an lei tih Assembly speaker Lalbiakzama chuan a sawi.Tunhnaia thuthar thehdarhtute zawhna chhangin speaker chuan, state budget 2023- 2024 ah MLA pakhat tan cheng nuai 10 theuh lirthei leina atan loan dah a ni a, MLA 40 ah chuan cheng nuai 400 tihna niin, hei hi tuna sawrkar kal mekin MLA-ten kan hmang lo ange, an tih kha a ni tih a sawi a. 2024- 2025 budget-ah motor vehicle advance atan nuai 450 dah leh a ni a, hemi hmang hian tuna car hi lei a ni tih a sawi.
2023- 2024 budget-ah lirthei leina dah a nih bakah 2024- 2025 budget-a lirthei leina (loan) dah hian budget-a awm lo chunga lei nia puh an nih chungchang chu a paihthla nghal tih a sawi.
Speaker office a luah tirhin official-ten lirthei thar lei turah an lo ngai deuh a, sawrkar sum dinhmunin a zir loh avang leh chief minister berin ‘Year of Consolidation’ a puang bawk nen, thla 4 vel chu lirthei awmsa ringin an awm chho a, ama lirthei bakah cabinet (VIP) rank – leader of the oppostion car chu Pu R Romawia speaker laia a car hman thin kha niin, hei bak VIP car tur Assembly Secretariat-in a lo nei lo miah loa, a ni pawhin an dinhmun hrethiam taka a hman ve naw naw laiin, an chenna in Durtlang Leitan lam a pan chhohnaah a car hi a tlan chhuak zo lo tih an hriatin, car thar ruahman tul an ti a, a lei tur a lo remchang bawk nen, an lei ta tih a sawi a ni.
A tira a car hman chu speaker hmasa car hman – Mahindra XUV 500 niin, tuna an lei thar chu Mahindra XUV 700 a ni a, cheng nuai 28 vel a ni tih Lalbiakzama hian a sawi. “Min puhna anga to uchuak leh changkang lutuka sawi tur chi a ni lem lo,” a ti.
“Hetiang thila inbeihna hi tawp tawh se ka duh hle a. Miin min puhmawhna zawng zawng sawifiah zel tum ila, hna thawh hman ngaihna a awm lo. Ram hnuk khawih thilah erawh miin min sawina kan palzut tur a ni loang,” a ti bawk.
Zawhna dang chhangin, oppostion party pakhatin SASCI sum tih lapse chungchang inhnialnaa Special Assembly ko an duh chungchangah Assembly speaker a nihna angin hriat a la nei lo tih a sawi a. “Koh duh tak tak nise, information ka dawn tawh ka ring,” a ti.
Budget-a awmsa atangin car kan lei, – Assembly speaker
