India ram danpui hman tan ni, Republic Day chu ram chhung hmundang rualin Mizoramah hman a ni a. Aizawlah chuan Sipai Lammuala hman niin, larsap Dr Hari Babu Kambhampati chuan ram puanzar pawtparhin parade contingent 27-in zahna chibai an buk a chhanglet.Food, Civil Supplies & Consumer Affairs minister B. Lalchhanzova chuan sawrkar hnuaia buhfai semtu retailer-te hah man chu ennawn a, tun aia sang deuh zawka revise sak tul a tih thu a sawi.
He thu hi, tunhnaia Sialhawk retailer atanga buhfai semchhuahin mipui a daih loh chungchanga The Aizawl Post-in sawrkar hmalak tum dan a zawhna supply minister-in a chhanna a ni.
Tunhnai khan Sialhawk khuaa retailer-te chuan, tunhmaa buhfai kg.10 turah kg. 8-a mipui an semchhuah thin chu sawrkar thar hnuaiah kg. 9-a sem tawh tura hrilh an nih hnuah, buhfaiin mipui a daih ta lo tih an sawi.
Hemi chungchangah hian Sialhawk retailer pakhat chuan, “Buhfai kg.10 turah kg.8 vela buk chuan a tawpah buhfai bag thum vel a chuang ve thin a, chu chu kan hlawh a ni ve mai,” tiin a sawi.
Kudam atanga an buhfai lakchhuah buk a tlin leh tlin loh chungchang zawhna chhangin, “A bag phai deuh, kudama kan buk that te hi chu kg.43 atanga 47 te a ni tlangpui a, chu chu kg.50 tling tura belh leh a ni thin,” a ti a. “A chang chuan kudam atanga buk ngai lova bag tling (kg.50) anga kan put chhuah chang a awm bawk a, chu chu in lama han buk leh hian kg.46 te a lo ni leh thin,” a ti. Kudam lam dem ngawr ngawr theih lohna a awm ve bawk niin a sawi.
FCS&CA minister chuan, “Ration buhfai buk tling lo tih hi chu tunhma atanga hriat chhoh reng tawh, a nih ang anga kan pawm tawh, tih vak ngaihna awm loa kan ngaih a ni,” a ti a. Sialhawk chungchangah, khawi laiah ber nge dik lo awm tih zawnchhuah a ngai tih sawiin, “A loopholes hi zawnchhuah a ngai a; weighbridge pawh tun aia strict zawka kalpui a ngai a, retailer-ten buk dik taka an lak theih a pawimawh,” a ti.
“Theihtawp kan chhuah anga, mipui lungawilohnate pawh kan bengkhawnin a siamthat hna kan thawk zel ang. Siamthat ngaiah suggestion a awm a nih chuan thurawn min pe hreh lo turin mipui ka sawm nghal a ni,” supply minister chuan a ti.
Buhfai retailer-te hah man ennawn a tul – Supply minister
