Mizoram sawrkarin buhfai supply tur a thlan dan leh a supply danah thil dik lo leh induhsakna a awm nia hria in Congress party chuan Loayukta-in a chhuizui theihnan complaint thehluh an tum tih an sawi.MPCC Vigilance Cell hruaituten thuthar thehdarhtute an hrilh danin, ZPM sawrkar tirh phatah Food, Civil Supplies & Consumer Affairs department chuan buhfai supply tur a thlan danah buhfai Grade ‘A’ supply tura tender chhang hniam ber RL Store Kulikawn Aizawl thlang loin, a aia quintal khat Rs. 149-a chhang to zawk LZ Juice thlan a ni a. LZ Juice-in buhfai a supply tur zat chungchang RTI hmanga mi pahnihin zawhna an zawh pawh chhanna inanglo pek niin, zawhna zawttu pakhat hnenah LZ Juice-in kum 2024- 2025 chhungin buhfai quintal 180000 supply anga chhanna pek a ni a; zawhna zawttu dang hnenah erawh quintal 200000 supply tir angin chhanna pek a ni thung tih an sawi.
‘Buhfai supply zat chungchanga FCS&CA department-in chhanna chi hnih a nei hi a mak hle a. Khawi hi nge dik zawk tih hi kan zawhna a ni,’ MPCC Vigilance Cell chairman R Vanlalvena chuan a ti.
LZ Juice-in buhfai an supply dan an chhuizuinaah, grade ‘A’ supply tura tender chhang siin, buhfai supply tur an leina Suhanna Enterprise Assam atangin grade ‘A’ buhfai ni loin buhfai man tlawm Common Rice (C-Rice) an lei tih finfiah a ni tih MPCC hian an sawi. ‘Mizoram sawrkarin finfiah loin C-Rice chu grade ‘A’ angin an supply ta a. Buhfai man tlawm zawk leh chhe zawk an supply avang hian nasa takin an hlawk belh dawn a. Supply minister hian LZ Juice atangin hlawkna a tel ve ngei ang tih rin loh rual a ni lo,’ an ti.
Challan-a a lan danin, 2024 May atanga 2025 March thlenga buhfai supply-na, Zuangtui Muanna Kudam-a buhfai an phurh thlennaah vehicle registration atanga a lan danin, JCB 4DX (bag 720), Mahindra Pick Up (bag 157), autorickshaw (bag 500), Ford Fiesta Car (bag 700), truck lian ke 16 nei (bag 21), Bajaj Pulsar Bike (bag 800) leh a dang tam tak a ni tih an sawi a. Heng bakah hian challan-a motor number inziak, mah se chhuizui pawha motor registration record awm lo buhfai phur motor tam tak an awm tih an sawi.
LZ Juice-in phai lam atanga Zuangtui Muanna Kudam-a buhfai an phurhluhna challan-a buhfai phurtu motor number chu ziahsual palh leh ngaih hai palh awm thei a nih avangin chutiang chu a thleng reng em, tih Muanna Kudam thuneitute chu 2026 March 11 khan MPCC Vigilance Cell-in an zawtfiah tih an sawi a. Kudam-a buhfai phurluttu lirthei reng reng uluk taka enfiah leh buk nawn vek a ni thin a, thu leh thil diklo hrang hrang awm theite uluk taka enfiah a ni thin tih an lo hrilh thu an sawi.
Kum 2024- 2025 chhung hian Mizoram sawrkarin LZ Juice atangin ni lo, SR Auto Rice Mill (NCCF), MIFCO, Food Corporation of India bakah OMSS(D) Scheme atangin buhfai a lei reng tho avangin, LZ Juice hi sum siamna atan a bika ruahman nia a lan thu an sawi a ni.
2026 March 21-a Supply minister-in a thusawiah, ‘LZ Juice-in buhfai an supply-na motor number chu ziah sual palh’ ni awmin a sawi tih MPCC hian sawichhawngin, ‘Heng motor number-te hi ziahsual palh ni loin, LZ Juice-in buhfai an supply zat tur ziah milna atan dawhkan atanga phuailuai taka challan phuahchawp an siam avanga an motor number tarlan leh a lirthei dik tak dinhmun inang ta lo niin kan ngai. Truck lian pui puiten phai atanga buhfai bag tlem te te phur anga challan an siam vak mai pawh dawhkan atanga supply order mil tura challan siamremna mai maiah kan ngai bawk,’ MPCC Vigilance Cell chairman hian a ti.
Zoram mipui buhfai eitur grade ‘A’ buhfai supply tura thlanin buhfai chhe zawk Common Rice an supply daih mai chu mipui zahlohnaah an ngai tih sawiin, ZPM sawrkar hnuaia buhfai supply dan chu chhuifiah a, thil ti diklotute hrem an nih theihnan Lokayukta-ah complain an thehlut dawn tih a sawi a ni.
Buhfai supply danah MPCC-in Lokayukta-ah thu thlen dawn
