Bukavu-a M23 kawng zawha thil puakah mi 11 thi
Democratic Republic of the Congo (DRC) khawchhak lama Bukavu khawpuia M23 hel pawl leh anmahni tantuten kawng an zawhnaa thil puakah mi 11 an thi a, mi 65-in hliam an tuar bawk niin hel pawl tangrual hruaituin a sawi.
DR Congo president, Rwanda-in helho a pui tia sawi thintu chuan Ningania thil thlengah hian mi tam tak an thi tih X-ah a tar lang a, ‘Congolese leilungah dan lovin ram dang sipai an awm’ tih a sawi.
M23 pawh telna, Congo River Alliance hruaitu, Corneille Nangaa chuan kawng zawhah hian amah pawh a tel ve tih a sawi a, thil puak hi grenade nia a hriat thu leh Congo-a Burundi sipaiten an hman thin ang a nih thu a sawi a. A ni ngei tih erawh hriat a ni lo.
A puak hmasa ber chuan mi a tichiai hle a, a pahnihna a puah leh hmain an tlan darh nual hman niin AFP news agency chuan a tar lang a. Mi chengte chuan a puah hnuah silai a ri zui niin an sawi bawk.
Mipuite chu kawtthlerah an tlanchhia a, thenkhat chu thi hnenghnuang an ni tih video-ah a lang a. Mi chengte chuan ruang an hmu a, eng zat nge thi tih erawh an hre mai thei lo tih an sawi.
M23 hian DRC khawchhak lam ram zau tak an la tawh a, khawpui liante thununin mi 7,000 chuang an thi tawh a. Naupang laka mipat hmeichhiatna hman pawh a awmin kumtlinglo sipaia chhawr pawh a awm nia sawi a ni.
Bukavu-a M23 kawng zawha thil puakah mi 11 thi
