German Bundesliga season kal lai table-a hmahruaitu nghet ni hlen hnai tawha ngaih Bayern Munich chuan Inrinni khan tlahniam thei tur dinhmuna ding mek pathum zinga awm pawn lang ber St. Pauli mualah 5-0 hnehna nuamsa chang lehin tun season league game 29-ah goal 105 tehreng an khawl tling ta!
Ti hian, Bavarians hian Bundesliga season khat chhunga goal thun hnem ber record ding lai an khum fel a, an game khelh tur la neih zat leh an goal thun theih dan enin khum harsa hle tur record an siam ngei dawn niin a lang.
St Pauli mual Millerntor-Stadion atanga an point thum hawn leh nen Bayern hian table-ah point 12-in hma an hruai fal mek a, point 76 nei tawhin, anmahni hnaihbertu Borussia Dortmund chu Inrinni inkhel dangah si khat faiin Bayer Leverkusen lakah an tlawm a, Munich club tan title a lang pha ruih tawh!
A hmuna inkhel entu mipui 29,546 lek hmaah Jamal Musiala chuan tan atanga minute kua an khelh tlin rualin mikhual goal hmahruai a thun er zawk a; Konrad Laimer cross atanga a goal hmahruai tauhluh kha season kal laia Bayern Munich league goal 101-na chiah niin, kum 1971-72 daih tawha Bundesliga season khat chhunga goal khung hnem ber record an lo siam tawh kha an nihrualpui ta chiah a ni.
Mak angreng takin league hmahruaitu team khan chawlhlawk hmain goal dang an khung belh zo lo a, second half-ah erawh goal a sur a ni leh ta ber a; Leon Goretzka, Michael Olise, Nicolas Jackson leh Raphael Guerreiro-te goal hmangin record ding lai an khum zawih zawih a, St Pauli goalkeeper Nikola Vasilj a lainatawm!
Vincent Kompany team Bayern khan season kal laia league match vawi 29 an khelh tawhah game 27 chhung chu match tinah goal hnih an khung tling ziah a ni!
Nilaini zan Champions League quarter-final second leg-ah St. Pauli game-a bench lama thu hahchawl thei England captain Harry Kane kha Kompany hian a chhawr thei turah ngai ila, Spanish giants laka 2-1 hnehna chang tawh an nih avangin tunlaia talbuai mek La Liga club lakah German team ropui hi rinkai zawk an ni ngei ang!
Bundesliga goal 100 khung pel Bayern!
