Aizawla sumdawngte tana bungraw hlan leh hlanthlak hun bituk sak an nih danah sumdawng pawl intelkhawm – Mizoram Merchant Association chuan an ngaihthiam loh thu an sawi.
MIMA thuchhuak chuan, Aizawl khawpui chhunga lirthei, peak hour-a loading and unloading chungchangah senior SP Traffic Aizawlin holiday leh Inrinni pawh huam vekin, Thawhtanni atanga Inrinni zing dar 8.30 atanga chawhma dar 11.00 leh chawhnu dar 3.00 atanga tlai dar 6.00 a phal loh hun a siam chu tha an ti lo tih sawiin, sumdawngte an ngaihtuah lo hleah an ngai tih a sawi.
‘Sumdawngte hi state dangah chuan an ngaihtuahin an hmakhua an ngai hle thin. Nikumah hemi chungchang hi SP Traffic-ah thlen a ni tawh a, inngaihhnathiamna nen kalpui niin, sumdawngte pawhin lirthei chepna hmunah loading and unloading tih loh nise, tiin sawiho a ni a. Tuna khauh taka hremna tur nena thuchhuah awm ta hi MIMA chuan a ngaithiam lo a ni,’ a ti.
Sawrkar chu sumdawngte tax chhunluha kal thei a nihna a awm ve bawk tih sawiin, ‘GST hunah phei chuan bungrua zawng zawng prepaid-in company-a pek vek a ni a, GST pawh pek nghal vek a ni. Kan hralh lohah pawh GST kan pe vek a, kan hralh loh leh old stock ah pawh GST kan pe. Sumdawngte hi tan kan ngai em em a. Sawrkara sum kan chhun luh hnem theihnan tuna order hi ngaihtuah tha leh tur leh a tuartu sumdawng pawlte pawh rawn turin kan ngen a ni,’ a ti.
NH-54 Aizawl to Vairengte kawng chuan ngaihthah a hlawh thin avangin kum 2023-ah state kan buai phah tawh MIMA hian sawiin, chief minister hnenah ngenna thehlutin, siam dan turah Kolasib SP-in thu a chhuah a. A bikin Thingdawl leh Kawnpui to Sairang Road a chhe zual tih a sawi.
‘Sawrkar hian he kawng hi ngaihtuah hle turin kan ngen a. Kawng chhiat vangin bungrua rei rei tak tak a thang hi sumdawngte tan mai ni lo, ram tan hlohna lian tak a ni. Helai kawng hi kan lifeline a nih bik zual avangin siamtha rang turin sawrkar kan ngen,’ a ti.
Mizoram chu Section 10(26) of Income Tax Act hnuaiah income tax awl kan nih laiin, Income Tax department chuan lehkha pe in a tibuai fo MIMA hian an sawi. ‘Hetianga Mizo sumdawngte min chhaih buai fo hi ching tawh lo se kan duh,’ a ti. Hetianga lehkha hmu emaw online-a dawnga harsatna nei chuan MIMA office-a in report turin an chah a ni.
MIMA hian heng an ngenna hi, Mizoram sawrkar, senior SP Traffic Aizawl leh Income Tax department-in a tihhlawhtlin ngei an duhin an beisei tih a sawi.
Bungraw load leh unload hun siamsak danah MIMA lawm lo
