June 25-a AMC Ward No.19 corporator thlan turah ZPM candidate Dr C Malsawmtluangi chu ZPM sawrkara minister leh MLA ho bakah AMC-a corporator ten an campaign pui.
Zirtawpnia Ward 19 huamchhung veng hrang hranga street campaign-ah minister Prof. Lalnilawma chuan ZPM chu MNF leh Congress aia policy nei tha, mipui huapzo policy neitu a ni tih a sawi a. Minister B Lalchhanzova chuan kan ramah rorelna tha an thlentir mek a, tuna zirtirtu lakah pawh Zoram mipui leh party hrang hrang an lungawi tlang tih a sawi.
Minister Lalnghingloa Hmar pawhin state-a ZPM-in sawrkarna a chan hma pawhin AMC Ward 19 mipuiin duhsakna an hlan a, corporator an pe tawh a; tun by election ah pawh he biala hmasawnna hna thawk thei tur leh MLA thurualpui theih tur, Ward chhung bial mipui khawngaihna a dilpui tih a sawi a ni.
AMC corporator Malsawmzuala chuan AMC budget cheng vaibelchhe 115.184 atangin Ward tin corporator-te ward fund atan nuai 35 theuh dah a ni a. Ward development fund hi a inzat theuh an nei thin. Nuai 35-ah hian mipui thawhkhawm property tax atanga lo let leh a tel bawk, tia sawiin, budget-a an pass thlap tawh Ward fund hi AMC MNF sawrkarin kum 2 chhung nuai 10-in a pe kim thei lo a; corporator-te nuai 20 theuh an ba niin a sawi. Corporator dang R Lalawmpuii chuan lui pawh a hnar a fim chuan.. tih angin ZPM hnar a fim a, chuvangin Ward mipui tan by election-a ZPM candidate thlang turin a dilpui tih a sawi a ni.
By election atan minister leh corporator-ten campaign pui
