Ram leh khawtlang rawngbawl tura a thlana mipuiin vote hmanga an thlanchhuah hmeichhiate intelkhawmna All Mizoram Elected Women Representatives hruaitute chuan Zirtawpni khan chief minister Lalduhoma a pisaah an kawm.
Pawl hruaitute hian chief minister hi lawmpuina hlanin, Mizorama a hmasa ber ni tura Cabinet minister-a hmeichhia (Lalrinpuii) a dah avangin lawmthu an sawi a. Tuna MLA ni mek Lalrinpuii leh Baryl Vanneihsangi te an pawlah tha takin an inhmang a, an tangkaipui hle tih an sawi. Chief minister-in hmeichhiate hamthatna lam hawi thu tha a sawi chuan an thla a timuang hle tih an hrilh a ni.
Chief minister hian Mizorama hmeichhiate venhimna lam thil pawimawh, engemaw case bika sawi duh an neih chu inthlahrung loa hrilhhre thin turin a ngen a. An pawl kalzelna turah duhsakna a hlan a ni.
An pawl president R. Zomuanpuii, general secretary Vanlalrengpuii leh executive member Lalremsangi Fanai ten chief minister hi an hmu a. An pawlah hian elected representatives ni tawh thin hmeichhia 1600 vel member an awm mek tih an sawi.
Cabinet-a hmeichhia dah vangin CM lawmthu hrilh
