Cachar-ah Nehru lim tichhia, Congress lawm lo

Cachar-ah Nehru lim tichhia, Congress lawm lo
Assam-a Cachar district, Pailapool-ah Prime Minister hmasa ber, Jawaharlal Nehru lim feet 10-a sang chu mi hriat lohten an tikehsawm a, hei hi eptu, Congress-in an sawisel nasa hle a, rorel lai, BJP-in thil tihchhiat chungchanga an ngawi tlat chu zawhna an siam.
Congress hruaitu, Pradeep Kumar Dey chuan Thawhlehni khan zinga veivakten thil tihchhiat hi an hmu tih a sawi a. “Hemi chungchang hi police-te hnenah kan hriattir nghal a, thuneitute chuan a tirah chuan milim hi amahin a tla niin an sawi a; mahse, CCTV footage-ah chuan pawl pakhatin excavator puihnain an tichhia tih a lang,” tiin a sawi.
Dey-a chuan he milim hi kum 1965-a din, Nehru College hmaah kum 2000-a dah a nih thu a sawi a, union minister hlui thi tawh, Santosh Mohan Dev leh Assam minister hlui, Dinesh Prasad Goala te pawn a tun dinnaa tel zingah an tel tih a sawi a. “Kum 1953 khan Nehru hmingin he hmunah hian high school din a ni a, hetah hian Prime Minister hmasa ber chawimawina ropui tak kan nei a ni,” a ti.
Congress chuan he thil thleng chungchangah hian FIR an thehlut a. Tualchhung police officer Shankar Dayal chuan thubuai thehluh a nih thu sawiin thil tihchhiatna atana hman excavator pawh an man tawh tih a sawi.
“Digital evidence engemaw zat kan nei a, kan team-te hian mimal inhnamhnawihte hi hriatchhuah tumin hma kan la mek a, kan hriat chian veleh puhte hi man an ni ang,” a ti.
Congress district hotu hlui, Abhijit Paul chuan he thil tihchhiat hi August, 2024-a a fanu, Sheikh Hasina-i thuneihna aṭanga paihthlak a nih hnua Bangladesh president dintu, Sheikh Mujibur Rahman-a lim tihchhiat nen a tehkhin a, Nehru hi zalenna sualtu, India hmalam hun siamtu a nih thu a sawi.
“A lim tihchhiat hi thil zahthlak tak a ni. Mi thenkhat chuan Nehru hi an politics rinna avang hian an duh lo hle a; mahse, a lim tihchhiat hian Hasina a tlak hnua Bangladesh pa lim tihchhiat a nih dan min hriatchhuahtir a, an pahnih ngaihtuahna hi a inang vek a ni,” a ti.
Paul-a chuan BJP ngawi renga awm chu zawhna a siam a, thinrimna nasa zawk neih a phut a. “He hmun hi BJP MLA Kaushik Rai-a bial a ni a, minister ni mah se a dodalna thu a sawi lo,” tiin a sawi.
Rai-a hian phone a chhang lo a, BJP hruaitu dangte chuan hemi chungchangah hian thu an sawi duh lo.