Chakma Autonomous District Council kal zel dan turah thuneihna tawp neitu Mizoram larsap leh Mizoram state sawrkar council of ministers duh dan a inkalh a, Governor’s Rule-a dahna chu sut leh turin larsap an ngen.
The Aizawl Post-a tarlan tawh angin, July 7 khan larsap thu angin District Council & Minority Affairs secretary chuan thla 6 chhung atan CADC hi Governor’s Rule-a awm turin hriattirna a tichhuak a. Larsap aiawha CADC enkawl kawnga thuneihna kengkawh turin Lawngtlai district bawrhsap ruat a ni.
Hemi chungchangah hian Home minister K Sapdanga chuan Thawhlehni khan thuthar thehdarhtute hnenah Chakma ADC Governor rule hnuaia dah a nihnaah mipui tana thil ngaihsual palh theih a awma hriat avangin, thil awmdan an sawifiah tih a sawi a. CADC-ah hian elected member 20 awm zinga member 16 chuan tunhnaiah ZPM party an zawm a. Heng MDC 16 hian ZPM Legislature Party siamin, CADC sawrkar an siam thei tih kumin June 16 khan an lantir tih a sawi.
Heng MDC 16 hi June 18 khan larsap hmaah an inlan a, CADC-ah ZPM sawrkar an siam theih thu an thlen a, siamtir turin an dil nghal a ni.
Chief minister Lalduhoma pawhin larsap hnenah, member 16 nei ZPM Legislature Party chu CADC-ah sawrkar siamtir mai tha a tih thu a thlen a ni.
Larsap-in Council of Ministers ngaihdan ziaka thlen tura a phut angin Council of Ministers chuan lungrual takin, popular sawrkar siam thei an awm chuan Council thiah chu tha an tih loh thu leh, member 16 nei ZPM MDC-te chu CADC-ah sawrkar siamtir mai turin July 5 khan larsap hnenah ziakin ngaihdan thlen a ni tih a sawi.
Larsap-in Council of Ministers ngaihdan ziaka thlen tura a dil hnuah, Council of Ministers ngaihdan ni lo zawnga thutlukna a siam leh ta tho si chu vanduaithlak an ti takzet tih Home minister hian sawiin, “Democracy zahawmna tihmelhem thei ni hialin kan hria,” a ti.
Hei vang hian larsap chu CADC Governor’s Rule-a a dahna notification chu sut (revoke) nise tih chu Council of Ministers ngaihdan a ni tih a sawi a ni.
Home minister tawiawmtu District Council & Minority Affairs minister C Lalsawivunga chuan, CADC-ah nihna inchuhna a nasat avangin larsap hnenah hian anti defection law hmang mai turin sawrkar chuan a rawt tih a sawi a. Council of ministers chuan Governor’s rule puang loin, sawrkarna chang thei tura ngaihte siamtir turin an rawt tih a sawi.
Zawhna chhangin Home minister chuan, larsap thuthlukna hi sawrkarin a pawmpui lo tihna a ni hranpa loa, council of minister thurawn a rawn lak takah chuan an lo rawtna chu kaltlangpui tha an tih thu an sawi mai zawk tih a sawi a ni.
Home minister tawiawmtu dang I&PRP&S minister Dr Vanlalthlana chuan, larsap thuthlukna notification tihchhuahah hian council of minister rawtna a lak thu ziah a ni a, a dawtah Governor’s Rule-a dah a nih thua chhunzawm a ni mai si a, Council of Ministers hian Governor’s Rule-a dah hi a rawt anga ngaih palh theih a ni tiin a sawifiah bawk.