CADS-in heroin hawng 400 man
Central YMA hnuai ruihhlo do pawl, Central Anti Drugs Squad (CADS) chuan hun engemaw chen an lo veh tawh, heroin hawng 400 (kg.4.821) chu Ningani zing dar 3.00 vel khan lirthei pahnih leh a khalhtu mi pahnih nen an man.
Car (Grand i10) MZ01 J 8898, a khalhtu Thangsangpuia (28), Zawra Veng Farkawn, tuna Ramhlun North-a cheng nia insawi atangin heroin hawng 200 (kg 2.400) man a ni a. Car dang (i10) MZ01 H 6514, Malsawmdawnga (29) Zawra Veng Farkawn, tuna Khawmawi Myanmar-a khawsa nia insawi khalh atangin hawng 200 (kg 2.421) man a ni bawk.
Lirthei khalhtu mi pahnih mante hian an lirthei khalhte hi Lalhmingmawia, Ngur khua, Champhai district nia an hriat, Zokhawthar leh Khawmawi Myanmar lama khawsa kual vel thin niin an sawi a. Tuna an ruihhlo phurh pawh hi ama ta nia an sawi bakah Lalhmingmawia hian Vairengte daia hnamdang (Vai) hnenah Rs. 80000 ve ve hlawha hlan tura inbe fel an ni tih an sawi a ni.
Lirthei khalhtute inpuannaah tun tum hi an vawi thum kalna niin, a vawi khatnaah hawng 100 ve ve phurin, a vawin hnihnaah hawng 200 ve ve an phur a, tunah pawh hian hawng 200 ve ve an phur leh niin an sawi.
CADS hruaitute sawi danin, Lalhmingmawia hian ruihhlo nasa takin a tawlh tih hriain theihtawpin an chhui reng a, ruihhlo tlawhnana a lirthei hman thin number an hriat hnuah an man thei ta a ni. Heroin leh a phurhna lirthei leh a khalhtute an man rual hian a neitu Lalhmingmawia erawh Myanmar lama a tlanchhiat hman avangin man a ni rih lo a ni.
CADS hian ruihhlo phur lirtheite hi Zokhawthar atanga a lo chhuah atanga a thlen chin hre zelin, Nilaini zan zantir atang khan Saitualah a tawp tih an hria a. Central YMA president hoin CEC leh CADS member thenkhatin Aizawl atanga kalchilhin Keifang leh Saitual chhehvel dapa an beidawn thelh hnuah Sub Hqrs YMA Saitual puihna in, an lo riahna Manase Home Stay, Tamdil Road PWD Veng Saitualah an nangching a, thuneitute thurawn angin Aizawl thlenpui an nih hnuah Excise & Narcotics Department-in an ruihhlo thuhrukna atanga hai chhuakin thubuai an siamsak zui a ni.
CADS-in heroin hawng 400 man
