CAFA Nations Cup 2025 khel tur
Indian Football Team
August ni 29 atanga September ni 8 chhunga Uzbekistan leh Tajikistan rama khelh tur CAFA Nations Cup 2025 khel tura tliong vek tawh Malaysia an inhnuhdawh leh tak si avangin an aiah head coach thar nei hnai Indian Football Team chu tournament khel tura lakluh an ni dawn.
CAFA Nations Cup 2025 atanga Malaysia inhnuhdawh chhan hi an head coach Peter Cklamovski berin ‘non-FIFA match window’ lai chuan player thlan buaithlak a tih vang a ni.
Non-FIFA match window an tih chu national team-te’n friendly match an khelh theih hun lai official Fifa International Match Calendar ni lo, chu mi pawn lam zawng sawina a ni a; CAFA Nations Cup 2025 an khelh hun tur hi international match (official national team competition) khelh hun atana Fifa-in a dah loh avang leh Fifa-in club-te chu hetih hun laia ram tana khel tura chhuahtir ngei ngei tur a tih hun lai a nih loh avangin club lama ei zawng player tam zawk tan league kal lai atanga pen a buaithlak thei dawn a, hei vang hian an manager duh dan angin Malaysia chu a inhnukdawk a, an hmunruak luah turin India an ding ta a ni.
Khel Now ziah danin India hi Asian team khawng Iran bakah Afghanistan leh a thlengtu ram pakhat zawk Tajikistan-te nen Group B lamah an awm ho dawn a, he thu buatsaih lai hian India sengluhna tur hi lehkha lamah tihfel a la ni chiah lo deuh a, mahse, he thu i chhiar lai hi chuan final paperwork an peih hman tawh tura ngaih a ni.
India tel ve tur hi a hun nge hun lo hle dawn tih zawhna a piang a; Blue Tigers hi November 2023 atang khan vawi khat chiah an la chak a, chu chu kumin March thlaa head coach bang ta Manolo Marquez-a hnuai friendly match-a Maldives an hneh kha a ni.
Tarlan tawh thin angin, tun dinhmunah record chhe tak hnutchhiah Marquez-a chhuah hnu khan Indian team hian head coach thar an la nei leh ta rih lo a, mahse, All India Football Federation (AIFF) lamin Technical Committee atanga shortlist candidate pathum an dawn tawhte atangin thutlukna an siam dawn hnai tawh a, tunkar tawp lam hi chuan Stephen Constantine, Khalid Jamil leh Stefan Tarkovic-te atanga a tu emaw ber hi thlanchhuah an ni hman tawh tura ngaih niin, head coach thar chuan chawpchilh angreng takin tournament hautak leh khirh zet tur CAFA tournament-ah team khawng lo ve tak a hruai dawn a, a career zel atan a chep phah palh ang tih a hlauhawm lawk angreng!
Tunlai Indian football-a saw hlawh kal mek chu head coach thar ni tura dilna thehlut zingah Spanish coach lar pahnih Xavi Hernandez leh Pep Guardiola an tel tih chungchang kha a ni a; AIFF lam insawifiahnaah dilna an dawnah Xavi leh Guardiola an ni ngei em tih a chiang lo tih vel a ni nuai a, boruak mak pui puiin Indian football a nuai mek laiin Asia khawmualpuia team khawng ber berte nen tournament an hmachhawnho leh dawn a nih hmel a, point box-ah bawk an va tang leh ang a, player-te rilru thlengin a pawthniam zo ang tih hlauhna pawh fans rilruah a lang tel thei awm e!
CAFA Nations Cup-a India awmna tur group lah hi a ‘tough’ dawn khawp leh nghal a, an hneh loh than thiau Iran, Afghanistan leh a thlengtu Tajikistan tihte an ni thuau a; he’ng fixture-te hi inbuatsaih ngai nasa tak October thlaa khelh tur AFC Asian Cup 2027 qualifiers-a Singapore an hmachhawn tur match hnih atan inpuahchahna a ni nghal thei thung ang.
AFC Asian Cup 2027 qualifiers third round-a Singapore nen match hnih an khelh tur hi India tan a pawimawh hle dawn a; group tin atanga team khat chauh tlang chho tur an nih laiin India hian bul an tan chhe lehpek hle a; Group C-a Bangladesh tih mai mai an inhnehtawkpui ringawt hnuah an aia ranking hniam Hong Kong an hneh lo leh a, Singapore nena an intum tur game hnih hi Blue Tigers tan do-or-die a ni tawh ang.
CAFA Nations Cup-ah hian Central leh South Asia-a team khawng ber ber an inlan dawn tih tarlan a ni tawh a; India bakah Oman chu he tournament-in a huam chin ni lo atanga sawmchawp ram (guest nation) tur an ni.
Group stage khelh zawhah group tina a sang ber theuh hian round sang zawk an kai ang a, second-placed team-te’n September ni 8-ah knock out round kai turin khelmual an lut chhunzawm ve leh ang.
India head coach thar tur chuan CAFA tournament atan squad a buatsaih nghal zung zung a ngai tawh dawn niin a lang a; round sang zawk an kai pha lo a nih pawhin group stage match thum an khelh tur hi Asian Cup qualifiers hautak zet atana player-te zirchianna leh tactic enchhinna atan India manager thar tan a tangkai thei tura ngaih a ni.
He boruak kal mekah hian Indian football kalphung (ecosystem) a la buaichuar chhunzawm zel a; tun thlenga AIFF draft constitution case chinfel a la nih loh avangin ISL 2025-26 season hi an tan ngei dawn em a la chiang lo a, FSDL leh Master Rights Agreement chinfelna tur pawh a la ‘pending’ avangin national team ke chheh pawh khirhkhan zual tura ngaih a ni.
Hei hi club lam dinhmun a la nih rih nuai lain AIFF lam hian CAFA leh AFC qualifiers atana training camp rei zawk luh a nih theihna turin ISL club-te chu a hma lama player chhuahtir (release) tura an ngen rin a ni .
Engpawhnise, tun atanga thla reilote hnuah chuan Indian football hawi lam a hriatchian deuh tawh tura beisei a ni.
CAFA Nations Cup 2025 Group Draw
Group A Group B
Uzbekistan (Host) Tajikistan (Host)
Kyrgyzstan Iran
Turkmenistan Afghanistan
Oman India