California-ah hlauhthawnna

California chhim lama chengte chuan thli na angreng tak an dawng thar leh a, hei hian ram kang la thelh mih lohte a tihnun thar leh hlauhthawnna a siam leh mek.
Chawlhkar hnih liam ta atang khan ram kang nasa tak tuarin mi 27 zet an thih phah a, chenna in sang tel a chhe bawk.
National Weather Service chuan Los Angeles leh Ventura county hmun thenkhat tan Thawhtanni chawhnu leh Thawhlehni tuk inkarah thli hi a thaw na thei tiin inralrinna a tichhuak thar leh a. Thli hi a chak laiah darkar khata km 113 thleng pawh a ni thei tih an sawi.
NWS-a meteorologist Rich Thompson chuan thli thaw leh boruak ro lutuk hi Ningani thleng kalkawp thei a ni tih a sawi a. Heng lai velah hian April thla atanga ruah a tlak tawh loh avangin a hlauhawm thei niin a sawi.
Thli thaw thei hi California chhim lam atanga San Diego thlengin a ni thei tih sawiin mi chengte chu a tul huna inthiar chhuak thei tur leh rikruma hman chi thil inring turin an ti a, a lirtheite pawh tlan chhuah thut a ngaiha a tanky zahve tal dah turin an ti.
Inralrinna dar khawn rik a nih leh mek lai hian Los Angeles huam chhunga January 7 atanga chhuak ram kang nasa pahnih, Palisades leh Eaton fire-te chu thelh tuma beih mek zel a ni a. Palisades hi 52% thunun tawh niin Eaton fire hi 81% thelh tawh a ni bawk tih fire thuneitute chuan an sawi.
Kang thelhtute chuan Palisades fire hian Pacific vaukama mel 37 vel an timit tawh tih an sawi a; mahse, a laili lamah a la kang reng niin an sawi.
Palisades fire incident thupuangtu, Dan Collins chuan, “A laili-ah a la kan reng avangin inralrinna sang ber khawn theih reng a ni a, thelh mih tawh chin pawh thli thaw vak avangin a la man kai thei reng a ni,” a ti.
Eaton fire thelhtute erawh chuan an thelh mih vek theih an inring tawh hle a. Hetih rual hian thing tamna hmunah chuan a ro ber kum an tawn mek avangin kangmei thar chhuak thei reng a la nih thu an sawi bawk.
California Gov. Gavin Newsom chuan kang thelhna khawl, tui phur thlawhna leh mihring eng emaw zat ram kang thar a awma che chhuak thei turin chhawp lawk sa vek a nih thu a sawi.
Palisades leh Eaton fire avanga thil chhe hlut zawng hi chhut mek zel a ni a, a pung hret hret zel a. Inspector-ten in chhiate an endik a, hetih lai hian Palisades fire bikah hian eng ang taka chhiatna hi nasa nge a nih hriat mai a harsa niin an sawi.
“Damage inspection team-te hian kangmeiin a tuam chin an fang chhuak vek dawn a ni,” tiin Collins chuan a sawi a. “Hmun thuma thena hmun hnih an zo tawh,” a ti bawk.
Pathianni atang khan Pacific Palisades tlangrama tlanchhiate chu haw leh phalsak an ni tan a, kang thelh thuneitute chuan an haw lehna tur hi tunah chuan an buaipui ber a ni rih.
Thuneitute chuan Inrinni khan Palisades-ah hian inthiar chhuah tur tihna hmuna luh tum mi pahnih an man a, kang thelhtu angin an in-chhal nghe nghe tih an sawi.
An pahnih hian kang thelhna thuam nen an inthuam a, Oregon fire agency-a mite niin an inawi a; mahse, an ni lo va, an truck chu lilamnaa an lei niin Los Angeles County sheriff’s department chuan a sawi.