World Cup 2026 khelh mek chu June ni 27, Pathianni zan atangin Last 32 khelh tan a ni a, last 32 a inkhel hmasa berah Canada in South Africa an hneh a, last 16 lut hmasa ber an ni.
Inelna thlengtu ni mah se Canada hi Group champion an nih zawh loh vangin an ramah an inlan thei lova, California-a SoFi Stadium-ah South Africa an hmachhawn a ngai. USA-a inkhel ni bawk mah se an ram ang thoa an tlangnelna a nih vangin tantu mipui an ngah hle tho a, mi 70000 lenna mualah South Africa tantu hmuh tur awm mang lo khawpin khelmual an luah khat hneh. World Cup a knock out round an luh vawi khatnaah hnuhma ropui an hnutchhiah a, last 16 an inhlangkai.
Last 32 kal kawng
World Cup 2026 thlengtu ram pathum zinga pakhat Canada hi World Cup-ah an la chak ngai miah lov, vawi ruk nawt an tlawm tawh. World Cup 2026-ah Group B-ah awmin, bul an tan tha lova, Bosnia & Herzegovina nen an inhnehtawk phawt. Bosnia lakah chak zo lo mah se World Cup-ah a vawi khat nan point an hlawhchhuak.
An match khatnaa an chak zawh loh hnuin World Cup 2022 thlengtu Qatar an hmachhawn a, 6-0 ngawta hnehna changin a vawi khat nan World Cup-ah hnehna an chang. Hnehna an chan vanga an phur em em laiin an match hnuhnung berah Switzerland hneh lovin an tlawm zui leh thung. Switzerland lakah tlawm mah se pahnihna ni chungin an tlang a, last 32 an lut.
South Afica hi group A-ah awmin chhe takin bul an tan a, Mexico lakah an tlawm nghal. Czechia lakah tlawm a, tla ngei tura ngaih an nih laiin tlawm an pumpelh hram a, point khat an hmu. Tlak an pumpelh hram hnuin South Korea an hmachhawn zui leh a, rinkai lo zawk chunga hnehna chang nawlhin point thum an hmu a. Khelh thum atanga point li hmuin pahnihna an ni a, a vawi khat nan last 32 an inhlangkai ve bawk.
Inkhel chu le
World Cup-ah a vawi khat nana knockout stage lut ve ve Canada leh South Africa te hian Sofi Stadium-ah last 16 luh ngei tumin tan an khawh a, inkhel hmuhnawm an lantir.
Fifa ranking-ah 30-na ni a, South Africa aia 30 zeta sang zawk Canada in an khingpui South Africa an ngam viau a, goal thun tumin an nawr nasa hle. Goal pawh an thun teuh thei hle. Canda tan hian CanMoise Bombito chuan a tauh goal teuh viau a, si nghak Williams pel tawh mah se defender Aubrey Modiba-a’n goal line atangin a lo dang hman hlauh a, an team a chhanhim. Mbekezeli Mbokazi pawhin Jonathan David a pet goal tur a lo dang hman hlauh bawk a, derthawng tak chungin South Africa an him hram hram zel.
Goal an thun theih lawk loh hnuin Canada an che fuh ta nge nge. Hun pangngai tawp hnu minute 90+2-ah Stephen Eustáquio chuan lei hrulah hlap lutin goal pawimawh zet a thun. Eustáquio goal thun hi South Africa lakah an chakpui a, tui let hnua an la tawn ngai reng reng loh hun hlimawm tawngin World Cup -ah last 16 an inhlngkai. Canada an chak lai hian uiawm taka him zo ta lo South Africa chuan World Cup 2026-a an zin kawng chu mittui nen an zawh tawp ta thung.
Inkhel hmuhnawm taka South Africa hnehtu Canada hian last 16-ah Netherlands leh Morocco te inkhela chak zawk zawk an su zui leh dawn a, fiahna hautak an hmachhawn a ngai dawn. An player pawimawh Alphonso Davies a inlan thei ta a, , Canda hi an phur viau thung ang.
Canada in South Africa an hnawtchhuak
