Ration buhfai khulna atan card var la hmang, khawsak harsa zual tana Mizoram sawrkarin card sen – ‘special package’ a duan angin, hemi atan hian dil hreh lo turin Supply minister B Lalchhanzova chuan mipui a ngen. Food Civil Supplies & Consumers Affairs department secretary, director leh officer dangte chu Thawhlehni khan an minister B Lalchhanzova ho hian kum kalta lama hmalakna thlirletin an thukhawm a. Minister chuan an department thupui tur chu, dinhmun harsaten an chanvo diktak chang se, buk dikin mipuiin buhfai dawng ngei se, tih a ni, tiin, “National Food Security Scheme hmalakna in mi 706296 a tuam mekah a phu ngei miharsate lut ve lo an la awm nual tih hriat a ni a. Hetihlai hian awmthei zawkte miharsate chanvo chang an la awm nual tih hriat a ni bawk. Dinhmun harsaten an chanvo ration card an chan ngei theihnan tha thlah loa hma lak zel tur a ni a, ration card dik nei tura hmalakna hi mipuiin hrethiamin min tawiawm se, kan ramin economic statistic dik a neih theihnan thil pawimawh a ni,” a ti.
Card vara dinhmun harsa la awmte tan Mizoram sawrkarin 2024 October 30-a a thuchhuah, buhfai kg khat Rs.20-a an khul theihna tur, Mizoram State Special Ration Package chu inthlahrung loa dil turin a mamawhtute an hriattir nawn tih a sawi a. Tun dinhmunah ration card sena ziahlut tawh mi 11570 an awm a, vengtin leh khawtina card sen mamawhten DCSO-ah dilna thehluh theih reng a ni tih a sawi.
Supply department chuan buk dika mipuiin buhfai an khul theihnan theihtawp a chhuah zel a, kudam atanga buhfai buk diklo awm thin chu umzui zelin, retailer-te pawh buk dika mipui hnena buhfai pe ngei turin a hriattir nawn tih FCS&CA minister hian a sawi a. Buhfai la tur ten kutzungpui nem (Epos) an hman danah inbumna a awmzui zel lohnan thuchhuah a siam reng tih sawiin, “Retailer atanga buhfai la tur ten an lak dawnah chauh kutzungpui nem tur a ni a, nem lawk emaw a ngai loh bakah nem loh vangin ration quata hi a bo thei lo,” a ti.
India ram pumah January 2023 atang khan buhfai man a to chho ta hle niin B Lalchhanzova hian a sawi. Sawrkar hmasa in card var hmangte buhfai khulna rate tihsan tumin thui tak hma a lo la tawh nia sawi bawkin, “ZPM sawrkar chuan sawrkar hmasa hmachhawp bawhzuiin buhfai man a ennawn a, an chanvo ang chang thei rih lo, dinhmun harsate tana ration card sen hi Supply department duan thar a ni a, a mamawhtuten hmang tangkai vek se tih hi sawrkar duhdan a ni,” a ti.
Mizoram chu Kristian state tia hriat kan nih avangin kan rilru puthmang siam dik chhoh a tul hle tih sawiin, “Chhungkaw tin kan sum lakluh milin langchhuak ngam ila, buhfai buk dik zalenna Mizoram nise, tih hi ka duh takzet a ni,” a ti bawk.
FCS&CA department chhinchhiah danin, tunah hian card eng hmang 63626, card pawl hmang 636265, card sen hmang 11570 leh card var hmang 460109 an awm mek a. Sawrkar chuan ration card atangin mitthi tawhte paih zel a duh a, mitthi hming engemawzat an paih tawh. Card vara buhfai khulte tan sawrkar chuan kg khat zelah Rs.10 subsidy pe mekin, card sen hmang ho tan subsidy Rs.20 a pe a ni.
Card var hmangtu khawsak harsa tan Special Package dil hreh lo ang – Supply minister
