June 30, ThawhTanni khan Tennis a inelna lian Grand Slam pali zinga ngaihhlut hlawh tak Wimbledon 2025 khelh Tan a ni. Wimbledon khelh Tanniah champion lai Carlos Alcaraz chuan harsa taka hnehna changin second round a lut. Alcaraz a chak laiin champion tura rinkai zinga mi Daniil Medvedev chu first round paltlang zo lovin a tla ve thung.
Wimbledon-ah vawi hnih champion zawn tawh Carlos Alcaraz chuan Wimbledon hmachhawn nawn tawh lo Fabio Fognini a hmachhawn. Kum 22 mi Alcaraz hian kum 38 mi Fognini a sawp tura ngaih niin, awlsam taka chak thei tura ngaih a ni. Beisei lawk loh ang takin Alcaraz hian a khel chhe viau thung a, kum 38 mi hneh turin set nga zet khelh a ngai a, tlawm thei dinhmunah a ding hman rum rum hial a ni.
Centre Court-a inhmachhawn Alcaraz leh Fognini te an khel Tha lo dun viau a, tihsual an ngahin, double fault an nei dun sek bawk. Beisei aia an khelh chhiat dun rualin, rin lawk aiin an inhnehtawk zui ta bawk. Set khatnaah beak a neih vangin Alcaraz-a’n harsa takin set a la.
Set hnihnaah an inhnehtawk zui viau a, tie-break khelh a ngai. Tie-break-ah Fognini a chungnung zawk a, set a la ve ta tlat a, 1-1 a ni. Set khat ve ve an lak hnuin set thumnaah an inhnehtawk zui leh viau. Fognini-a’n break theihna hun Tha zet mai nei mah se a chhawr Tangkai zo lo. Alcaraz-a’n break a neih hnuin Fognini-a’n break a nei ve leh a, an inhnaih hman leh viau. Hun pawimawh takah Fognini-a’n a serve a hum zawh loh vangin Alcaraz-a’n set a la nawn leh a, awlsam takin a chak zui mai rinna a lian leh hman viau.
Hnufual zawka a Tan hnuin set linaah Fognini a khel Tha zui ta viau thung a, break a neih zawn vangin awlsam takin set a la. Fognini hian beisei phak baka a khelh That chhoh vangin inlehthalna lian thlentirin, Alcaraz a hneh theih rinna lian tak a awm zui nghal. Beiseina sang tak nen set ngana hmachhawn mah se mak tak maia a hmahruaina zawng zawng a hloh fai zel vangin Fognini-a’n a serve a hum zo lo zawn a, 4-0 zetin Alcaraz lakah a hnufual. Fognini hian break let tum viau mah se a hlawh tling zo tawh lo va, champion lai Alcaraz hian Fognini lakah 7-5 6-7 (5-7) 7-5 2-6 6-1a hnehna changin fiahna hautak a paltlang a, second round a lut zui ta a ni.
Fognini lakah harsa taka chak Carlos Alcaraz hian second round ah tualchhung tlangval Oliver Tarvet a hmachhawn zui leh dawn. Alcaraz hmachhawn tur Tarvet hi Tennis-ah professional player pawh la ni ngai lo leh inelna lian la hmachhawn ngai lo a ni a. Qualifier a paltlang hram vanga a vawi khat nan inelna lian Wimbledon hmachhawn thei a ni. Kum 21 mi Tarvet hi World ranking-ah No. 733-na a ni mek a. Inelna lian a hmachhawn hmsak berah a khingpui Leandro Riedi chu 6-4 6-4 6-4 in a hneh nghal a, pui zetin Grand Slam-ah bul a Tan. Tarvet hian tu pawh hmachhawn se chak nawn leh theih a inrin thu a sawi a. World No. 2 Carlos Alcaraz hneh ngei tumin Tan a khawh zui ve leh ang.
Harsa taka Alcaraz a chak lai hian champion tura rinkai zinga mi Daniil Medvedev chu No 64 Benjamin Bonzi lakah set khat chiah lain a tlawm ve thung a, second round lut zo lovin a tla a, Wimbledon 2025-a a zin kawng chu hma takah a zawh tawp.
