Mahua Moitra chu Member of Parliament a nihna hlihsak niin Trinamool MP hi Parliament a Narendra Modi sorkar laka zawhna pawimawh tak tak sum thamna laa zawtah puh a ni.
Zawhna a zawh theih nan hian Mahua Moitra hian ‘luxury items’ te lawmmanah lain hei vang hian na taka hrem tur tiin Ethics Committee chuan a lo ti lawk tawh a. Moitra hian sumdawng hausa Darshan Hiranandani-a’n zawhna pawimawh zawh tirin Rs 2 crore cash-in a dawng tih a ni bawk.
Moitra leh amah thlawptu lam chuan sum pakhatmah lak a ni lo tiin an hnial ve thung a. He mi chungchang hi CBI te chuan an chhui chiang mek a ni.
Ethics Committee report chu Lok Sabha-ah pharh niin BJP leh Opposition te chu an inbei zui nghal a, opposition te chuan sawihona neih an ngiat zui a ni.
Trinamool boss leh Bengal Chief Minister Mamata Banerjee chuan Moitra nawrchhuah chu BJP te ruahman lawksa tia sawiin ruling party sawiseltu langsar ber a nih vang a ti a. Mahse, hnawhchhuah a nihna chuan inthlanah a pui zawk ang, tiin a sawi bawk.
Ethics Committee tena Moitra chungchang an report phek 500 dawn vangin BJP leh opposition te chu an inbei viau a. Opposition MP te chuan committee report chu zirchianna hun siam ni se tiin hei bakah hian Moitra chu a insawifiahna hun pek an phut a ni.
Moitra puhnaah hian thamna a lak mai bakah a log-in details te chu sumdawngte a hrilh bawk a, chu chu MP tih atana mawi lo leh unethical conduct a ni tihsak a ni.
Lok Sabha Speaker Om Birla chuan Moitra thusawi remti lovin kum 2005 pawh khan MP 10 ban an nih khan insawifiahna hun pek an ni lo va, Khatih laia Speaker Somnath Chatterjee khan MP te chuan report pharh a nih tawh chuan House a thusawi zui turin dikna an nei tawh lo a ti tiin a sawi a. Speaker berin resolution vote a lak tur a tih hnuah Opposition member te chuan an chhuah tauhsan zui a ni.
Trinamool Congress MP Kalyan Banerjee chuan an party chuan Lok Sabha Speaker Om Birla hnenah ethics panel report chhiarna hun darkar 48 tal pe tura an ngen thu a sawi a. He report avang hian Lok Sabha chu \um hnih lai rorel thei lova tihtawp lailawkin a awm a ni.
Lok Sabha-a Trinamool Congress leader Sudip Bandyopadhyay chuan Mahua Moitra hnawhchhuahna chu ‘politics a phuba lakna’ tiin a sawi a, Adani Group te chungchang House-a a sawi chhunzawm tawh loh nana ruahmanna a ni a ti.
Speaker Om Birla pawh hmuin House floor-ah Moitra chu a insawifiah ngei theih nan hun pe tura a ngen thu a sawi bawk a. Bandyopadhyay chuan eng vangin nge zawhna zawh a nih theih nan Moitra chu sum pek a ni tia sawitu MP chu Ethics Committee-in thuzawhfiah atan an koh ve loh a ti bawk a.
“Ethics pannel meeting hmasa ber chu hun rei lo te neih niin engmah tihchianin a awm lo va. Eng vangin nge meeting an neih nawn loh? Eng vangin nge an hmanhmawh em em?” tiin zawhna a siam bawk a.
Bandyapadhyay chuan Ethics Committee report chu Zirtawpniah khan Private Members’ Business tih ni ruat bikah kher eng vangin nge pharh a nih a ti bawk a. “Thawh\anniah pawh an pharh thei reng a, khawiah pawh an tum hi a lang chiang sa vek zel a ni. Politics thila phuba lakna dik tak a ni,” tiin a sawi a.
Bandyopadhyay chuan sorkar chuan Moitra-in Adani group te nena inthlunzawma a sawina chu an tei thei thlawt lo a ni, a ti bawk
‘Cash-for-Query’ vangin Lok Sabha member nihna Trinamool Congress MP Mahua Moitra hlihsak
