CBI hnena general consent pek danah Congress party chuan rorel lai ZPM party chu mipui hmaa sawidun puiah a sawm nawn.
MPCC Vigilance Cell chairman Lalnunmawia Chuaungo chuan ZPM sawrkar leh chief minister-in CBI hnenah general consent an pe nia an sawi chu thudik ziktluak lo, mipui rilru hruaisual tumna a ni tih a sawi a. Ningania Mizoram People’s Forum hruaituten an kawm tuma chief minister-in, ram dan tharin a phut anga CBI hnena general consent pe nia a sawi chu Indian Penal Code 1860 thlaktu Bharatiya Nyaya Sanhita 2023 nia a lan thu sawiin, CBI consent pek chungchangah he dan thar hian engmah phut a nei lo tih a sawi.
“CBI director-in state tinte hnena lehkha a thawn dungzuia ZPM sawrkarin consent thar a pek, 2024 July 1-a Mizoram gazette notification-a an chhuahah pawh he ‘dan thar’ hi sawilan a ni miah lo,” a ti.
CBI hnena pek hi general consent nge partial consent tih aia pawimawh zawk chu, “phalna/ consent pek hian enge a huam” tih a nih thu MPCC senior vice president Lalnunmawia Chuaungo hian a sawi a. Chief minister ni ta in 2023 MLA inthlan campaign laia CBI hnena ‘general consent’ pek a tiam leh, sawrkar thar pian hnua Assembly Session hmasa ber – 2023 December 14-a a sawi, sawrkar kaltaah Lokayukta-in CBI hnena pek a rawt pathum, sawrkara thehluh, sawrkarin lo dang chata pek a phal loh chu ZPM chuan general consent an pe dawn a, engmah phalna an dil a ngai dawn loa; an kuta thu lut chu an investigate mai dawn, tia a lo sawi tawh thu a sawi nawn.
Tunah general consent pe inti si a, 2024 July 1 gazette notification an chhuahah ‘Mizoram sawrkar hnuaia public servant-te CBI-in a chhui hma in state sawrkar phalna ziaka lak hmasak phawt tur a ni’ an ti leh si chu a inkalhin chhun leh zan ang a ni tih a sawi.
“ZPM-in CBI hnena general consent kan pe an tih leh, MNF sawrkar kaltain partial consent an pek khan danglamna pakhatmah a nei lo. Thudik ziktluak lo hmanga mipui rilru kaihhruai tum hi bansan turin kan ngen a. Mipuiin thudik an hriat theih nan ZPM party-a he thila hriatna nei tha ber berte nen mipui hmaa sawiho tha kan ti a. Chumi atan chuan ZPM hi kan ngenin kan sawm a ni,” a ti.
CBI general consent pek dan sawiho puiah ZPM sawm nawn
