Centenary lawmna’n
Indian Hockey a thilphal!
An kum 100 tlin lawmna chi khat atan Indian Hockey (HI) chuan hockey player leh a buaipuitute tana chanchin lawmawm a puang a, sum lama puihna a tihsan bakah ram pum huap lawmna siam a nih tur thu a puang.
July ni 27, 2025 khan Tamil Nadu khawpui pakhat Mahabalipuram-ah HI hian inkhawmpui lian (15th Hockey India Congress) hmanginn, tah hian sum lama puihna an san a; kumin November ni 7 hian ram pum huapa Hockey India kum 100 tlin lawmna intawhkhawm lian (nationwide hockey festival) huaihawt an rel tlu nghal bawk.
Financial grant an tihpun dan chuan senior men’s leh senior women’s national championships atan cheng nuai 70 zel dah a ni a, junior leh sub-junior mipa leh hmeichhe category hoah cheng nuai 30 dahin, state chhunga local competition atan cheng nuai 25 dah thar a ni a, hei hi tournament tihphuisuina leh infiammi naupang zawkte talent haichhuahna kawnga hmasawnna atan ruahman a ni.
He’ngte bakah hian state association tinte hnenah district leh state-level competition an thlawpzia lantirna bakah talent haichhuahna leh grassroots atanga dawmkan zelna hmanrua atan cheng nuai 25 zel kum tin pek thin an ni anh.
Sum leh paia puihna (grant) tihpun chungchanga HI thilphalna thar hian sum lama organizer-te harsatna tawh thin a sukiang hawk thei tura ngaih a ni a, player tha zawk rawn chhuak zel tur a pui hle bawkin a rinawm.
Indian hockey kum 100 tlin lawmna pui ber tur Nationwide Festival an tih hi Hockey India chuan November ni 7, 2025 hian a huaihawt dawn tih tarlan a ni tawh a; he event-ah hian a rualin hockey match 1,000 tehreng an khel dawn a, ram puma district tinah mipa leh hmeichhe match khat ve ve theuh khelh kim vek tura ruahman a ni!
He lawmna pui takah hian player 36,000 chuang an inrawlh dawn a, Indian hockey huanga mi zawng zawng an lenzia pholan leh he ram zau takah hian hockey hmanga inlungrualna lantir chu an thil tum pakhat a ni.
Hockey India president Dilip Tirkey chuan kum 100 tlin lawmnain a tum (objective) thil pahnih tarlangin – Indian hockey ropui vang lai, Indian hockey golden legacy chawimawi leh hriatreng bakah hun hmasa lama mi huai kalhmasate sulhnu (legacy) kha thangthar leh chhuan thar lo chhuak mek leh lo la chhuak zel turte hnena tuh leh hlanchhawn zel chu a pakhatna a ni.
Pahnihnaah chuan Indian hockey hmlam hun atana lungphum nghet tak phum a ni a; tuntuma sum lama puihna sang zawk an puan theih chhan pawh hi generation thar zelte zingah talent haichhuah loa phumbo mai mai a tlem zawkna atana tih a nih thu a sawi.
Indian hockey thuneitu sang ber inkhawmpui lianin funding thar a puan tak hi player, coach leh grassroots official-te tan hlu hle tura ngaih a ni.
November 7 festival lawm tur pawh hi hun hmasa lama he sport lo ropui thinzia leh hausakzia tarlanna satliah mai ni loin, India national game a nih ang taka he rama hockey dinhmun tlahniam tak chawikan a, a nihna ngaih luahtir leh tumna a ni tel.
Centenary lawmna’nIndian Hockey a thilphal!
