Sawrkar laipui tirhin Viksit Bharat Sankalp Yatra (VBSY) hmalakna atana prabhari (in-charge) a ruat, Ministry of Health & Family Welfare addl. secretary V Hekali Zhimomi chuan Nilaini khan Aizawlah he hmalakna in a kaihhnawih sawrkar department hotute an thutkhawm pui.
Sawrkar laipui aiawha lokal hian VBSY ruahman a nih chhan a sawifiah a. Eizawnna kawng, hriselna lam, sum khawl leh dehchhuahna kawng hrang hrangah sawrkar laipui chuan department kaltlangin mipui tan hamthatna scheme a kalpui a. Tangkaipui tam tak an awm laiin, hmang tangkai thei leh mamawh ve ngawih ngawih, inhrilhhriat that loh avanga an mamawh tak scheme a awm tih pawh hre lo an awm avangin Viksit Bharat Sankalp Yatra hi kalpui a ni ta tih a sawi.
Ngawrh thei ang bera inhrilhhriatna kalpui turin India state leh union territory tinah IEC (Information, Education & Communication) van (lirthei) tirin, hun tiam chhungin outreach programme tha taka kalpui a nih tur thu a sawi a. A bikin hmun kilkhawr zawkte ngaipawimawh tur leh, tribal mite tana sawrkar laipuiin a ngaihpawimawh zual bik zinga tel – Eklavya Model Residential School enrolment tam zawk neih, scholarship scheme leh Van Dhan Vikas Kendra chu hrilhhre tam turin a chah.
VBSY state nodal officer, Planning & Programme Implementation secretary Lalmalsawma Pachuau chuan IEC van ho hi December 16 khan vailiam an ni tawh a, district hrang hrangah Yatra hi kalpui mek a ni tih a sawi. Department tinte mawhphurhna leh hmalak tur la awmah thawhhona tha tak nen he scheme hi tihhlawhtlin ngei tum a nih tur thu a sawi bawk.
Thutkhawmah hian Agriculture, Rural Development, Social Welfare Tribal Affairs & Women & Child Development, UD&PA, PHED, ICT, H&FW, Cooperation, School Education, H&TE, LAD, LR&S, I&PR, Fisheries, AH&Vety, LESDE department atangin leh MzSRLM leh lead bank atangte in department hotute an tel a ni.
Central scheme VBSY kalpui dan central mi tirh hoin thlir
