Nilaini khan Central YMA hruaituten Bangladesh atanga Mizorama raltlante, Parva III leh Vathuampuiah an tlawh a, Tuichawng Group YMA, Branch YMA hruaitute leh khawtlang hruaituten an lo dawngsawng.
Parva III-ah hian Vantlang inkhawmah Central YMA president Pu R Lalngheta’n thu a sawi a, an sahimna zawnga rawn lutte thlamuang taka awm turin a chah a, YMA, sorkar leh Mizo mipui te’n an tih theih chinah theihtawpa \anpui an inhuam thu a sawi.
CYMA hruaitute hian Parva III-ah hian BSF hotute an kawm nghal a, raltlante dinhmun leh an harsatna te an sawipui. Manganga sahimna zawnga India ram rawn pante harsatna lo siamsak lo tur leh lo tanpui zawk turin an ngen.
Central YMA hian mipuite thawhkhawm atangin tanpuina, mutbu, silpouline, emergency light, camp-a hman tur electric bungrua, solar lght, charger bakah pawisa fai cheng nuai hnih (Parva-ah Rs 45,000, Vathuampui-ah Rs 30,000, Chamdur P-ah Rs 40,000, Mautlang-ah Rs 30,000, Hmawngbu-ah Rs 30,000, Tuichawng Group YMA hnenah Rs 20,000) an hlan. Pastor Sawmkhupa ralna a fanu hnenah YMA hmingin Rs.5000 hlan a ni bawk.
Central YMA hruaitute hi Chawngte-ah an riak a, Group YMA leh Branch hrang hrang hruaitute nen an inkawm. Central Young Chakma Association hruaitute pawhin an lo kawm a, Central YMA president chuan CYLA hruaitute chu kan unau raltlante lo puihna kawngah theihtawpa tang ve zel tur leh an tana harsatna siam tur zawnga che lo turin a ngen.
Central YMA atang hian President R Lalngheta leh assistant secretary Prof. Malsawmliana te bakah CEC member mi 8 an kal a, Sub-Hqrs YMA Lunglei hruaitute an kal bawk.