Spanish Primera Liga season kal meka an tumpui apiang la hneh fai vek Barcelona chuan Nilaini zan khan sikhat faia an mikhual Getafe hneh lehin, Olimpic Lluis Companys Stadium-a goal lut awmchhun hi first half minute 19-na leka Robert Lewandowski tihluh niin, season kal laia a league goal sarih khung tlinna a ni tawh.
Ti hian, La Liga season thara match sarih an khelhah Hansi Flick-a team hi la chak fai vekin, an hnuai chiaha pahnihna luahtu Real Madrid nen khelh zat inangah point li bawkin an inthlau leh ta a ni.
Karlaihawla Barca chakna goal awmchhun hi Jules Kounde cross atanga lo chhuak niin, Getafe goalkeeper David Soria chuan he cross ball hi hmun himah bengchhuak zo lain Lewandowski zawnah a tla a, hnai set sawt atangin Pole hian a thun zui ta a, ti hian, a league game khelh hnuhnung vawilia goal rukah inrawlhna neiin, chu’ng zinga goal li chu a thun niin, goal hnih dang a siamchhuak thung.
Getafe hian an siphurh sutna hun remchang nei mah se Alex Sola cross chhe lo zet chu Carles Perez-a’n Barca goalkeeper Inaki Pena zawn takah a tauh a, mikhual fans goal lawm beiseina a tawp!
Kum 25 mi Pena tan tun kha season kal laia first eleven hmun a chan vawikhatna niin, Villarreal an khelh tuma inhliam captain Marc-Andre ter Stegen ai a awh a, Ter Stegen hian zai hial a tawh zui tak avangin tun season-a a kir hman a beiseiawm loh a, Spaniard Pena hi kan hmu chho zel rih tura ngaih a ni.
Barca hian kumin August thlaa kum 34 mi ni chunga football khelh chawlhsan ta Arsenal leh Juventus keeper hlui Wojciech Szczesny kha kum khat chhung atan lakluh an tum tih thawm a rikchhuah mek laiin Getafe an hneh hnua media a hmachhawn tumin boss Flick chuan a player neih mekte chungchang bak engmah sawi a neih rih loh thu a sawichhuak.
“Inaki hi kan number one goalkeeper a ni chho ta rih a, a lakah hian ka lungawi hle a, chu zawng chu ka sawi theih a ni,” a ti zet a, kum 25 mi Pena tih loh an goalkeeper dangte an la naupan hlawm em avangin tawnhriat ngah zawk keeper an mamawh thu leh mithar lakluh chungchang an ngaihtuah thu a sawikai a, thutlukna an la siam dawn tih a sawi..
Nilaini zan inkhelah kirleh ila, Lamine Yamal chuan goal khung lo mah se mikhual tlarhnung chhaihbuaitu a ni leh a, box pawn chiah atanga a shot pui tak chu Getafe keeper Soria chuan goal kham nemperin a dansak hlauh a ni.
Raphinha pawh hun pumin a khel nung a, goal ban sira a tauhchhuah leh goal pawna a free-kick petchhuah bakah a goal tur dang Soria kein a lo dansak hmuh tur a awm.
Barca khan dan pangngaiin inkhel thunun hneh leh hle mah se an hun tha neih an bawhpelh tam deuh a; hun tawp dawnah Getafe substitute Borja Mayoral chuan an siphurh sutna tura a hun tha neih a bawhpelh ve bawk.
Marc-Andre ter Stegen a chhawr theih loh a, Barcelona boss-in Pedri a chawlhhahdamtir bawk a, anni pahnih bakah hian hliam avangin Dani Olmo, Gavi, Frenkie de Jong, Ronald Araujo, Fermin Lopez leh Andreas Christensen an la chechhuak thei lo a, an player heti zat chhawr thei lo chungin Nou Camp club hian an khelh apiang la hneh vek chungin point 21 nen league table-ah hma an hruai chhunzawm zel.
Inrinni hian pasarihna luahtu Osasuna an luhkhung ang a, karleh Champions League-ah Monaco laka an bultanna inkhela 2-1-a an tlawmna chhanglet turin Young Boys an mikhual zui leh dawn a ni.
Nilaini zan La Liga inkhel dangah goal awm loin Girona leh Rayo Vallecano an inhnehtawk ve bawk.
Chak loh thiam lo Barcelona!
