Mizo Zirlai Pawl chuan Mizoram chhunga Chakma hel pawlin training camp pariat an neih chu tih tawp a nih theih nan hma la turin Central Young Chakma Association a hrilh a. An tihtawp tir lo a nih chuan hma an la dawn tih an hrilh a.
Mizoram hi state ralmuang ber tia hruaituten an lo sawi thin a ni a. India sawrkar leh MNF inremna a awm hnuah rambuai a reh a, state danga hel pawl hrang hrang awm ang hi a awm ve lo va, hmasawnna hna thawh lo pawt buaitu pawl emaw, hel pawl emaw pawh an awm lova, engkim mai hi ralmuang tak leh zalen taka tih theih vek a ni. State dangah chuan hel pawl hrang hrang an tam a, hmasawnna hna pawh a nihna tur angin an thawk hlei thei lo thin; mipui an ralmuang lova, sawrkar pawh hel pawlte avangin a kal mumal thei lo thin.
Chakma hel pawl training-na camp pariat zet mai Mizoram chhunga a lo awm reng mai hian state ralmuang ber nihna a rawn thai bo a tih theih awm e. Hel pawlin Mizoramah bu an khuar tih thawm ringawt pawhin mipui awm a tinuam lova, chu chuan Mizoram ralmuanna boruak a rawn tichhe nghal a tih theih ang.
Chakma foreigner lo lut tur kan helh em em laia, foreigner pawh ni satliah lo, PCJSS (Parbatya Chattagram Jana Samhati Samiti – United People’s Party of the Chittagong Hill Tracts) hnuaia hel pawl nia sawi ten zalen taka Mizoram chhunga training camp 8 lai mai an lo nei reng hian, ram chhung himna tura hmalakna lamah kan sang falua lo a ni ang tih a rin theih a. Kan ralmuan dan hi ralmuan dan him a ni dawn lo tihna tluk a ni a, hei hi ngaihtuah chian a pawimawh dawn hle niin a lang.
MZP hmalakna hian sawrkar beng a thleng tura ngaih a ni a, Mizoram sawrkar pawh hian phut leh nawr ngai lova a tihtur ang a tih nghal a pawimawh hle awm e.
Chakma hel pawl training-na
