Chalfilh bialtu MLA, Assembly speaker Lalrinliana Sailo chu a awmna party MNF chuan an din nawn tir dawn loa, bial dangah pawh an din tir dawn lo. A bialah hian an party-in an din nawn tir dawn lo tih hi a hma daihin a hre tawh a, a tira he party-a sawm lut tute chu tuna amah dotute an ni ta zawk tih a sawi.
The Aizawl Post leh thuthar thehdarhtu dangten an kawmnaah Lalrinliana Sailo chuan a bial ngaia din tir a ni dawn lo tih hi a tan thil thar a ni loa, kum 2019 vel atang khan an party vice president pakhat tawngkam atangin a hre tan a, 2021 kan chuankai meuh chuan a ding dawn tawh lo tih hi a rin chian tawh thu a sawi.
Din tir a nih loh chhan a hrechiang bik lo tih sawiin, “US(A) a ka kal vang, ti te an awm a; a ngaihna ka hre bik lo,” a ti.
Assembly speaker chu lai tura beisei leh ngaih a nih angin a thiam ang tawka laiin House inkhawm a kaihruai thin tih a sawi a. Hemi chungchang an party (MNF) in Vanapa Hall-a an rel tum pawhin, hei hi an thuthlukna a ni a, hei vang hian Hnam Run (MNF Gen. Hqrs.) ah pawh nihna pek loh an rel a, hei vang tak hian Hnam Run (MNF office) pawh a kal tam lo tih a sawi.
Zawhna chhangin, seat a chan tak loh avangin MNF party chhuahsan tumna a nei loa, amaherawh chu politics-ah chuan ‘thian hlun leh hmelma hlun a awm thei lo’, tih a nih angin, a awm dan tur chu hunin a la hril mai dawn nia a ngaih thu a sawi a. Political party chhungah thian neuh neuh an neih ve tawh avangin, boruak chiang loa an awm atang khan sawm dertu te chu an awm ve daih tawh tih a sawi bawk.
A bial kalsan tur Chalfilha ding tur chuan ‘palian’ leh ‘thawm na’ ve deuh a ngai tih sawiin, tuna MNF-in candidate-a dah an tum chu a tlin zawh a rin loh thu in Lalrinliana Sailo hian zawhna a chhang. “An tihfel hun a tlai deuh tawh bawk si nen,” a ti.
2023 October 3 kha MNF party-a a luh atanga kum 5-na chiah a ni, tiin, he party-a amah sawmlut tute chu tunah MLA-a a din lohna beitute zingah an tel leh tawh tih a sawi a ni.
Thudawn danin MNF Nomination Committee chuan an party ticket-a Chalfilh biala ding tur hian K Lalhmangaiha, Mualpui Bethel ITI Veng Aizawl an ruat a. Chalfilh biala ding tur hian Hrangturzo bial atanga chhuak tur Home minister Lalchamliana chu MNF Nomination Committee hian a sawm phawt a, a chhungte nen an inrawnkhawm hnu ah a pha nia sawi a ni. MNF hian vawiin – October 4 hian kumin MLA inthlanpuia an party candidate tur mi 40 hi an puang thei dawn tih sawi a ni bawk.
Chalfilh bial MNF candidate tifel “Min sawmtuten min do ta thung” – Lalrinliana Sailo
