Mizoram State Museum buatsaih Govt. Gandhi Memorial High School Champhaia museum exhibition leh awareness campaign chu Nilaini khan district bawrhsap James Lalrinchhana’n a hawng.
Bawrhsap chuan Champhai district chu Mizo pipute sulhnu pawimawh tak tak awm tamna a nih avangin museum awareness neih a pawimawh tih a sawi a. Pipute sulhnu hrang hrang hmuh tur mahni hmun ngeia a awm chuan Mizo culture hriatthiamna a thlen a, Zonun zemawi hriatrengna a hnutchhiah, tiin, Mizo history, hmanrua an lo hman thin leh thuam an inbel thinte zirna hmun atan museum chu thil pawimawh tak a ni tih a sawi.
Competitive exam hmachhawn turin mahni culture leh history hre lo tan a tlin theih tawh loh tih James Lalrinchhana hian a sawi a. Hnam ropui tak takte an ropui chhan chu an tobul an hriatchian vang a nih thu leh hnam rohlu leh thil hlu an dah pawimawh tlat vang a nih thu a sawi. “Culture tidal thei tam takten inchimralna a thlen nasa a, thangthar leh zirlaiten kan tobul, pipute sulhnu zirchian nachang kan hriat chuan Mizo hnam hi chimralna tur lakah a veng dawn a ni,” a ti.
Mizoram State Museum curator C Lalrinfela chuan Govt. GM High School chu Mizorama museum nei hmasa ber school a nih avangin museum exhibition hi buatsaih a ni tih a sawi a. Museum hian hmanlai atanga hnamin thilhlu a neih hlutna phochhuah chu a tum ber a ni tih sawiin, hnam rohlu chi hrang hrang tarchhuahna a nih avangin museum chu a hlu hle a, chhiar chawp ngai loin en maia hriat zung zung theih a nih angin museum chu zirna run pawimawh tak a ni tih a sawi bawk.
Champhaiah museum thil phochhuak
