Champions League – Bayern, PSG leh Inter chak
Thawhlehni zan Uefa Champions League – league stage khelh chhunzawm niin, hnehna chang zingah Europe club lian pathum – Bayern Munich, Paris Saint-Germain leh Inter Milan an tel.
Atlético Madrid 0-2
Bayern Munich
Spain rama zin chhuak Bavarians tan kum 18 mi lek Lennart Karl chuan second half tir lam minute 54-ah goal hmahruai thunin, kha kha tun season-a a Champions League goal hmasaber a ni.
Rawlthar Karl kha first half-a a reh hle hnu chawlhlawk zawhah Atletico defender bumin Atleti keeper Jan Oblak-a dan zawh loh goal a khung.
Minute 74-ah Konrad Laimer chuan Harry Kane thawhrah atangin mikhual goal hnihna leh si hnih faia Bundesliga club chakna goal a thawh zui ve leh bawk.
Ballon d’Or trophy a lak hnua European match a khelh vawi khatnaah Kane kha goal-ah a luck lo a, Champions League-a goal thun rei ber ni mek Cristiano Ronaldo record nihrualpui turin chance nei mah se a hun tha neih a hmangtangkai zo tlat lo.
England captain hian Champion League match a khelh hnuhnung vawi 10-ah goal khung fai vek mah se Atletico goalkeeper tan harsatna a siam zo tlat lo!
Oblak khan Dayot Upamecano chhuih an lo dankawi pawh goal kham fuh turin a khawihper hman a; lehlam goal-a ding Manuel Neuer erawh a reh hle a, mualneitute atangin target fuha ball kal hmachhawn tur vawi khat chiah hun pumin a tawng!
Riyadh Air Metropolitano stadium-a inkhel kha a hmunah mipui 69,821 zetin an thlir!
Bayern Munich hi tun Champions League season kal laiah tlawm la nei lo an ni a, khelh lia point riat hum, chungin team 36 inelna kal mek table-ah pariatna an luah mek a; November ni 25 khian an campaign kal lai chhunzawmin Lille an tum leh ang.
He mi zan vek hian point li nena 22-na luah mek Atletico pawhin Norwegian champions Viking an su ang.
Villarreal 0-6 Paris Saint-Germain
Estadio de la Ceramica chhunga entu mipui 20,036 lek pungkhawm hmaah Europe goal thun khawl PSG-in an ze ngai bawk chhuah lehin, ti khan, tun season Champions League game li lek an la khelhah goal 20 an thun tling der tawh a; goal nga lek la chhuahin, point 12 an hmuh tawh nen table-a an hmahruaina an chhunzawm zel a; anmahni hnaihbertu Barcelona bakah an hnuaia indawt thla team panga – Aston Villa, Liverpool, Real Madrid, Sporting CP leh Real Betis-te lakah point thumin hma an hruai fal mek.
Paris St-Germain goal ruk hi mi hrang thiau panga thun niin, Fabian Ruiz chuan goal hnih a thawh thung a; hei hian goal thun kawngah player pahnih khat leka innghat an nih lohzia leh goal thun thei an ngahzia a tarlang!
An goal hmasa palite kha first half minute 17 chhunga an tihluh niin, second half-ah goal hnihin an belhchhah leh a; hun tawp hmain home supporters beidawng thinrimin khelmual an chhuahsan nguah nguah!
An goal chhuah hmasak palite kha Spanish club tlarhnung inthlahdah leh fimkhur tawk loh vang vek tiin a sawi theih a; khati ang tlarhnung zangkhai lo kha tun season Europe-a Barcelona leh Manchester City tihte lakah pawh goal li fai thak thak lo thun tawh Ligue 1 giants tan chuan nuam sing khaw a ni ber e!
Joao Neves chuan Villarreal lamin corner an thenfai zawh loh chhawrin goal hmahruai minute ngana lekah a khung er zawk a; Desire Doue, Senny Mayulu leh Ruiz-te’n chawlhlawk hmain goal khat diat diat an khung.
Second half-a goalkeeper Peter Gulacsi goal hnih chhuah belh lehte kha Fabian Ruiz leh rawlthar kum 17 mi lek David Boly-te tihluh a ni.
Hmahruaitu PSG hian November ni 25-ah AS Roma an mikhual dawn a, vawi khat chiah la chak Villarreal-in he mi zan hian Slavia Prague an luhkhung ang.
Feyenoord 0-3 Inter Milan
League stage-a an vawi hnih chakna ni turin Italian club hian Netherlands ramah point thum an hlawhchhuak a; tualchhung derby lama an tlawm hnu Europe-ah leirem an rap zui leh nghal.
Inter goal hmahruai hi minute kuana leka Yann Bisseck thun niin, khel tha tak England full-back Djed Spence thawhrah a ni.
Darkar chanve khelh pelh lawkah Pio Esposito chuan mikhual goal hnihna thawh ve lehin, mipui 43,649 fuankhawmna Stadion Feijenoord-a goal hnuhnung ber leh sithum faia Inter Milan chakna goal ni zui ta erawh second half tir lam minute 54-a Poland midfielder Piotr Zielinski thawh a ni thung.
Serie A season kal laia tlawm an la neih loh kha karliamta Inrinni khan AC Milan chuan San Siro-ah tihtawpsakin khelmual an intawmpuite lakah 1-3-in Inter an tlawm a, mahse, Europe game hmasa vawi thuma point thum chauh rut team khan an game linaah hnehna changin, point ruk nen table-ah 14-na an luah.
November ni 24, Thawhlehni zanah Serie A club hian Stuttgart an mikhual ang a, he mi zan vek hian Dutch team Feyenoord pawhin Porto an mikhual ve bawk ang.
Thawhlehni result
Galatasaray 2-0 Stuttgart
Shakhtar Donetsk 0-1 Sporting CP
Atletico Madrid 0-2 Bayern Munich
Barcelona 3-0 Aston Villa
Bodo / Glimt 0-0 Lille
Feyenoord 0-3 Inter Milan
LASK 4-0 Slovan Bratislava
Manchester United 3-2 Roma
Villarreal 0-6 Paris Saint-Germain