Champions League goal 10,000-na khungtu Ramos

Champions League goal 10,000-na khungtu Ramos
Red card hmuh tam lama hming chher hlimhlawt Sergio Ramos chuan a tha lamah pawh hming a chher kal ve reng a, Nilaini zan Champions League Group B match-a Sevilla leh PSV Eindhoven inkhelh tumin Champions League goal 10,000-na chiah a tilut a, he competition-a a goal 16 thunna leh Estadio Ramon Sanchez Pizjuan khelmuala Sevilla hmahruaina goal a ni nghal.
Champions League goal hmasaber chu he hming puttir kum 1992-a Everton forward hlui Daniel Amokachi thun niin, khatih lai khan Club Bruges tan a khel a; midangin goal an han khung chho malh malh a, Nilaini zan khan Spain defender hlui Ramos chuan he tournament chanchina a goal-na singkhatna hi a rawn thun ta a ni.
Real Madrid defender hlui Ramos-a Champions League goal hmasaber chu kum 2005 December thlaa Real Madrid thuam inbel chunga a tihluh niin, chumi atanga ni 6,773-naah a Champions League goal 16-na a thun a, he competition-a goal thun inkar hun chhung nei reiber a ni nghal.
Kum 37 mi hi Champions League-a goal khung thei upat lama a palina niin, goal khungtu upaber chu kum 40 mi ni chunga goal la thun pap pap thei Real Madrid centre-back hlui ve bawk Pepe kha a ni.
Sevilla boss Diego Alonso chuan PSV Eindhoven lakah khan Champions League history-a starting line-up upaber a remchhuak a, player 11 kum chawhrual kha kum 32 leh ni 19 niin, February 2012 daih tawha kum 31 leh 331-a upa Inter Milan starting 11 kha a rawn khum ta a ni.
Nilaini zan inkhelah La Liga club tan Ramos chuan first half minute 24-ah mualneitu team hmahruaina goal khungin, second half tir lam minute 47-ah Youssef En Nesyri chuan sihnih faia Sevilla hmahruaina goal a khung belh a, chak mai tura ngaih an ni hman.
Sihnih faia hma an hruai hnu minute 66 Sevilla player Ocampos hnawhchhuah niin, Dutch team-in a tam zawk nihna an hlawkpui hma hle a, minute 68-ah Ismael Saibari chuan mikhual siphurh pakhat zawk sutin, minute 81-ah Sevilla player Nemanja Gudelj chuan ‘own goal’ thunin PSV siphurh a sut zawhsak a; hun pekbelh minute hnihna a kal mek laiin USA forward Ricardo Pepi chuan 3-2-a Eindhoven chakna goal a thawh a, khelh ngaa point hnih hum chungin Spanish club-in Group B mawngphah an luah nghet leh sauh!
Nilaini zan an group inkhel dangah hmahruaitu Arsenal chuan 6-0 tehrenga an mikhual Lens sawpin, khelh khat la awma point 12 hum chungin knock out stage an lut fel a, anmahni hnaihbertu PSV lakah point lia an san tawh avangin last 16 an lut chiang ta a ni.