Sihnih faia an mikhual Royal Antwerp an sawpna kawnga FC Porto goal hnuhnung zawk khungtu Pepe chu Champions League chanchina goal khung thei upaber a ni a, Thawhlehni zan Group H inkhel hun pekbelh intanna a kal mek laia a goal tihluh lai khan kum 40 leh ni 254 chiaha upa niin, kum 38 leh ni 59 mi ni chunga record siamtu Francesco Totti a hmakhalh ta a ni.
Portuguese defender daih rei Pepe hian he competition history-a outfield player upaber a nih mekna a nemnghet nghal bawk. He record hi October ni 25-a Antwerp nen bawka an intum tum khan a lo siam tawh a; Champions League hrim hrima game khel thei upaber chu December 2007 daih tawha kum 43 leh ni 252-a upa ni chunga Lazio tana Real Madrid hmawchhawntu goalkeeper Marco Ballotta kha a ni thung.
Thawhlehni zan Porto khaw inkhelah de Lima Barbosa chuan darkar chanve pelh hleka an penalty hmuh hmangin mual-neitu team hmahruaina goal a chhuihlut a; Belgian club kechheh pelh hlen chhanah hian second half tir lama an player pawi-mawh Fernandes da Conceicao hnawh-chhuah kha a kawh tel ve theih bawk ang.
Champions League goal thuntu upaber Pepe
