Champions League last 16 lut zo lo Real leh PSG!
Nilaini khan Uefa Champions League group stage (league stage) an khel zo a, a sang pariat luaha direct-a last 16 lut team pariat zingah champion lai Paris St Germain an tel zo ta lo a; Spanish club ropui Real Madrid pawh play-off kaltlanga knock out round luh chuh chhunzawm tur team 16 zingah an tel pha chauh bawk!
Benfica 4-2 Real Madrid
Portugal khawpui Lisbon khelmual Estadio da Luz-ah Kylian Mbappe chuan goal hnih khung bawk mah se mualneitu team lamin goal li an thun ta bik a, an manager hlui Jose Mourinho enkawl Portuguese club lakah Europe-a tum 15 tehreng champion tling tawh Real Madrid hi 4-2-a tlawmin, automatic qualification an chang zo ta lo!
Table-a pathumna luah chunga an league stage match hnuhnungber khel Bernabeu club an tlawm tak avangin khelh riata point 15 nen La Liga giants hian table-ah pakuana an luah pha ta chauh a; Champions League knockout round lut turin play-off an khelh a ngai dawn a, vawiin draw-ah hian Norwegian club Bodo/Glimt an tum a rinawm.
Top-eight thleng zo lo talbuai Nilaini zan inkhel tawp dawnah Real player pahnih Raul Asencio leh Rodrygo-te hnawhchhuah an ni a, play-off lamah an inlan theih loh hmel.
An kawtkaia point thum hlu tak an hlawhchhuah avangin Benfica pawh play-off khelh phakna hmun hniam ber 24-naah thuin, anmahni ang bawka point kaw hum ve team pathum Marseille, Pafos leh Union Saint-Gilloise-te aiin goal difference-ah an sang zawk a, last 16 lut turin beiseina an la nei zui thiang ta bik a ni.
Paris Saint-Germain 1-1
Newcastle United
Defending champion PSG hian hma takah goal khung bawk mah se an hmahruaina an humhim zo lo a, team pahnih hian automatic place chang zo loin play-off an khelh a ngai dawn.
Automatic-a round of 16 lut team pariatte chu table-a an san dan indawtin – Arsenal, Bayern Munich, Liverpool, Tottenham Hotspurs, Barcelona, Chelsea, Sporting CP leh Manchester City-te an ni.
London club lian Arsenal hi kalphung thara team 36 inelna (new 36-team group format) kal mekah 100% chak record nei chunga Champions League last 16 lut thei hmasaber an ni.
Tun tum hian English club paruk ngawtin round of 16 an chuangkai a, play-off kaltlanga hmabak la nei Newcastle-in an la belhchhah mai thei bawk!
Automatic qualification chang zo lo Serie A club hraw pahnih Inter Milan leh Juventus-te pawhin knock out ram thleng turin chance an la nei a; vawiin draw-ah play-off khel tur team 16-te intum dan tur a hriat ang.
Nilaini Champions League
League Stage
Ajax 1-2 Olympiakos
Arsenal 3-2 Kairat
Athletic Club 2-3 Sporting CP
Atletico Madrid 1-2 Bodo / Glimt
Barcelona 4-1 Copenhagen
Bayer Leverkusen 3-0 Villarreal
Benfica 4-2 Real Madrid
Borussia Dortmund 0-2 Inter Milan
Club Brugge 3-0 Marseille
Eintracht Frankfurt 0-2 Tottenham Hotspur
Liverpool 6-0 Qarabag
Manchester City 2-0 Galatasaray
Monaco 0-0 Juventus
Napoli 2-3 Chelsea
PSV 1-2 Bayern Munich
Pafos 4-1 Slavia Prague
Paris Saint-Germain 1-1 Newcastle United
Union Saint-Gilloise 1-0 Atalanta