nformation Public Relation Printing & Stationery minister B Lalchhanzova chuan P&S chu a tiavai zawng nilo, a changtlung zawng zawka kalpui an tum tih a sawi.
IPRP&S minister hian Ningani khan Lungleia a department chan hrang hrang – IPRP&S, Food Civil Supplies & Consumer Affairs leh Land Revenue & Settlement hmunhma tlawhin, thawktute nen department hmalakna leh tul dang an sawiho.
P&S chu department lo inbun nghet tawh a ni a, ram tana service lo pe reng tawh a ni, tiin, changtlung zawka kalpui an tum mek tih a sawi a. Lunglei Printing & Stationery office pawh a tiavai zawng ni lo, a ngelnghet zawnga kalpui tum a ni tih a sawi.
P&S chuan sawrkar document pawimawh – election leh assembly thil bakah sawrkar thil pawimawh tam tak an buaipui tih B Lalchhanzova hian sawiin, “Kuminah pawh Education department nen thawk dunin zirlaibu (textbook) kan chhu a. Zirlaibu hi sikul tan hmaa chhut zawh vek a ni,” a ti.
Mizo firm an hman thu, a lehkha phek (paper quality) pawh a that thu a sawi a; stationery item hrang hrang quality tha zawk leh man tlawm zawka an hralh chhuah reng thu a sawi bawk.
Lunglei District Court sakna atana Mizoram Government Press awmna, Lunglawna P&S hmunhma leh building nena ram inthleng dilna leh rawtna awm avangin Government Press minister hian hi a en a. Sawrkar kalphungah chuan khawi hmun pawh nise, ram leh mipui tana thil tha zawk a thlen theih dawn chuan department leh department karah ram an inthleng thin tih sawiin, Aizawl atanga rel rel ngawt chi a nih loh avanga a hmuna tlawh a ni tih a sawi. Chutihrualin dilna tihhlawhtlin ngei tum nghalna a awm loa, chief minister hoa la ngaihtuah zel tur a ni tih a sawi a ni.
Minister hi IPRP&S secretary Betsy Zothanpari Sailo leh official dangten an tawiawm a ni.
Changtlung zawkin Printing & Stationery kalpui kan tum – IPRP&S minister
