March 13 khan Mizoram leh hmun dangah Mizote Kutpui – Chapchar Kut hman a ni a. District hrang hrangah sawrkar hotuten an hmanpui. Aizawlah chuan chief minister Lalduhoma chu “Kut Pa” a ni a, larsap Gen VK Singh (Retd) pawhin a telpui. Kumina Chapchar Kut thupui atan “Zo nun zemawi – Inremna” tih hman a ni.
Kut Pa chuan khawvel hmun hrang hranga awm Zofate Kut chibai a buk tih sawiin, kan pi leh puten Chapchar Kut hi hlim taka hman ngei an tum thin avangin tumah an inhau duh ngai loa, inremna hunah an hmang thin a. Kumina Kut thupui nen pawh a inhmeh em em tih a sawi a ni.
Inremna chu lal leh upate pawh khan an ngaihlu a, ro an relna tinrengah “Chalrem” leh “Saui tan” dan chu thiam takin an hmang fo thin, tiin, “Inremna atana thil pawimawh tak chu a mawhphurtu nih ngamna leh a tul anga thupha chawi ngamna hi a ni. Kan thiam lohna leh fel lohnaah midang puhmawh loa, ‘Ka thiam loh a ni e, ka mawh a ni e’ tih ngamna hian inremna, damna a thlen thin. He Kut atang hian mawhphurhna la ngam turin huaisen thar ang u,” a ti.
Inremna a awm theihnan social media-a kan thu post leh comment fimkhur turin chief minister hian a chah a. Politics thila ‘lim inhalsak’ chu Mizo hnamzia a ni lo, tiin, rorelna hmunah tawngka in inkhak bawrh bawrh mah se, an inhaw zui ngai reng reng loa. Inngeih takin an inkawm zui leh mai thin tih a sawi a. Inremna Kut an hmang a ni tih hria in, mi zawng zawng inrem thar turin a sawm tih a sawi a ni.
Central YMA president R Lalngheta chuan, Chapchar Kut chu hnama min dintu Pathianin kan hnam tana ni ropui min buatsaihsak a ni, tiin, uar deuh deuh a tul tih a sawi a. “Kan thupui – inremna nunpui a, Mizo hnam ti vul zel turin Zofa zawng zawng ka sawm a ni,” a ti.
Chapchar Kutah hian ‘chief minister chawimawina Nopui’ sem a ni a. Mi panga – Esther Hnamte – artist (Lunglei), Lalhmingmawii – lemziak thiam (Chaltlang), Henry Lalhmingmuana – rickshaw driver, a passenger-in a lirthei cheng nuai 17 a theihnghilh kim takin a pe let (Lawngtlai-III), VL Bela – nungcha leh ramngaw humhalhna atana Zotheihuan siamtu (Electric Veng Aizawl) leh John Lalrinchhana Jahau – entreprenuer (Khuangleng) an ni a. Nopui dawngtute hi sumfai cheng nuai khat leh thuziak pek an ni. Kumin Chapchar Kut hi chawimawina Nopui pek chhuah tum khatna a ni.
Veng fai intihsiakna lawmman leh Mizoram Bana Kaih hnuaia CM Special Award pawh sem a ni a. Central YMA kaihhruaiin Cheraw kanpui leh Khuallam entir a ni. Pipu zai, lam chi hrang hrang, Mizo infiamna, Thingdim lemchan, Pawnto entir a ni a. Pang Cultural Troupe-in ‘Thla Koh’ an entir bakah NEZCC aiawh Meghalaya leh Sikkim Troupe ten an hnam lam an entir bawk.
Chapchar Kutah mi 5 hnenah nopui Inremna atan thupha chawi ngamna: – Chief minister
