Chawhmeh zawrh phal lohnaah inpho leh
Tuikual Veng huamchhunga Horticulture directorate chhehvel kawngkamah Aizawl Municipal Corporation-in inzawrh phal loh thu a siam tawh hnu ah Inrinni kalta, April 19 khan chawhmeh zuar engemawzat chu kawngkamah an inzuar leh a, AMC hotute chuan inzawrh phal a nih loh thu hrilh nawnin, Inrinni awm leh turah chuan khauh taka inzawrh phal loh thu hi kalpui an tum dawn tih an sawi.
Treasury Bazar a kan hnu ah AMC hian helai thute hi Tuikuala AMC Multi Complex-a chawhmeh zawrhna tur hmun a siamah a insawn tir a. Helai chhehvela kawngkamah inzawrh an phal lo zui bawk. Hei hi tha taka kenkawh niin, senior SP Traffic pawhin helai kawngkama inpho an awm tawh loh avangin chhim leh hmar zawngin lirthei kal theih a nih thu pawh mipui a lo hriattir tawh a ni.
April 19 zinga inpho an awm leh takah hian Aizawl deputy mayor R Thanglura hoin AMC hotute chuan kawngkama inphote hi phal lohna hmuna inpho an nih thu te, an inpho chhan leh inpho a rem tawh lo tur thu te an hrilh nawn a ni.
Chawhmeh zuara kawngkama inphote sawi danin, AMC Multi Complex-ah hian ground floor chu an inphona tur a nih tel laiin, helai hi lirthei dahna hmun atan hman a ni a, lirthei dahtute hian an dahsawn duh si loa, thutna an chang lo niin an sawi. Thenkhat erawh Multi Complex lama seat allotment nei lo hrim hrim pawh an awm tih sawi a ni.
April 19 tuka chawhmeh zuar inpho an awm leh tak avang hian lirthei tlan vel pawh a ti harsa hle a, Traffic Police lam hian chawhnu lam atanga tlai thleng chu one way (chhim lam atanga chauha tlan theih) in an dang leh ta ringawt tih thu dawn a ni bawk.
AMC hotute hian a hma chuan duty an indah thin a, an thuchhuak an zawm tha viaua a lan tak avangin an lo inthlahdul ve deuh a, hetiang hian kawngkama inpho an awm leh ta nia sawiin, Inrinni awm leh turah chuan khauh taka inpho phal lohna hi kenkawh leh an tum tih an sawi a ni.
Chawhmeh zawrh phal lohnaah inpho leh
