Checkgate-a hmunphiah dan chhan enfiah sak turin phut

Minister hlui Zodintluanga Ralte chuan Mizoram sawrkarin Vairengte Forest check gate-a hmunphiah phur an kaltlangtir lo chu enfiah a phut tih a sawi.
MPCC secretary-te nen Vairengte Forest check gate an tlawhnaah Zodintluanga chuan, hmunphiah chingtute harsatna a hmunah enin an harsatna a zawtfiah a. Mizoram sawrkarin Forest check gate-a hmunphiah phur an kaltlangtir loh avangin sawrkar a dem hle tih sawiin, kuthnathawktu ngaipawimawh inti sawrkarin kuthnathawktute tharchhuah hmunphiah, check gate-a kaltlang an phal lo chu sawrkar mawhphurhnaah ngaiin, mipui zah lohna leh hmunphiah chingtute hmuhsitna a ni tih a sawi.
Hmunphiah hi a keh hunlai tak niin, kum danga rate sang zawka hralh theih thin kha kuminah chuan a par kg khatah Rs.8 velin a hralh theih chauh tih Zodintluanga hian a sawi a. Hmunphiah hralhna man tlahniam chak lutuk avang hian hmunphiah chingtute an mangangin an beidawng hle, tiin, sawrkar chu hmunphiah chingtute tan ruahmanna siam a, an harsatna a rang thei ang bera chinfel sak turin a ngensak tih a sawi a ni.
“Kum dangah chuan tun ang hunah hian a man sang tak takin an hralh tawh thin a. Sawrkarin an tan hmalakna a nei lo hi Vairengte kuthnathawktute harsatna lian tak a ni. Hmunphiah hring hralh tur nei an nih deuh vek avangin a hralhnaah harsatna an tawk nasa a, Forest check gate-a a kaltlang thei lo hi a lungchhiatthlak hle,” a ti.