Chelsea an chak nghal

Manager thar Xabi Alonso hnuaia inkhel an hmachhawn hmasak berah Chelsea chuan A League club Western Sydney an hmachhawn a, tum thum ngawt hnufual zawka an tan hnuin hnehna an chang let. Season thar atan inbuatsaihna friendly match an hmachhawn tumin Chelsea hian Pedro Neto hattrick hmangin hnehna an chang.
Xabi Alon hova inkhel an hmachhawn hmasak berah Chelsea hian bul an tan tha viau a, inkhel tan atanga minute 7-na lekah rawlthar kum 17 mi Dastan Satpaev chuan hmahruaina goal a thun nghal. Goal an chhuah hnuin Western Sidney an insiamtha nghal thuai a, defender Anthony Pantazopoulos chuan minute 14-na lekah goal thunin an si phurh a sut.
Team lian lakah goal an thun vangin an phur viau a, goal thun hmasa zawkah an tang. Minute 32-naah Aydan Hammond chuan hma an hruai letna goal a thun. Hnufual zawk an nih hnuin Chelsea in tan an khawh thar leh a, midfielder Dario Essugo chuan minute 38-naah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Australia club Western Sydney an khel tha chhunzawm a, Dylan Scicluna chuan minute 62-naah hma an hruai nawn lehna goal a thun. Hma an hruai nawn leh vangin phur viau mah se Chelsea tan Jamie Gittens chuan minute 66-naah goal thunin an si phurh a sut zui leh. 3-3 a an inhnehtawk hnuin Western Sydney tan Awan Lual chuan minute 78-naah hma an hruai nawn lehna goal a thun a, chak ngei an inring hman hle.
Si an phurh zak zak hnuin Chelsea tan bench atanga lut Pedro Neto chuan minute 80-naah goal thunin an si phurh a sut zo hmasa zet a. Neto hian 85 leh 89-ahte goal a thun belh leh a. Minute 9 lek chhunga hattrick siamin Chelsea a chakpui.
Manager thar Xabi Alonso hnuaiah hmasawn ngei tumin Chelsea in tan an khawh a, an squad thuam chak hna an thawk chho mek. British transfer record in Morgan Rogers an la lut. Season tharah sang zawka invawrh tumin hma an la nasa hle a, an squad thuamchak leh zual an tum zel bawk.
London club lian Chelsea hian season liam ta khan beisei an phak lova, season tharah European competition an khel phak dawn lo Heti a nih vang hian an tang thar leh zual hle nghe nghe a ni.