Thawhleh zan khan Caraboa Cup quarter-final khelh a ni a, penalty hmanga Newcastle United hneh hramin Chelsea in semi-final an lut. Semi-final lut zingah Middlesbrough an tel.
Chelsea hian Stamford Bridge-ah Newcastle United an mikhual a, an mualah tlawmin, semi-final an lut lo teuh hle. Hun pangngai tawp thleng an si phurh an sut theih loh hnuin hun pek belhah Mykhailo Mudryk goal thun hmangin an si phurh an sut thei hram a. Penalty shootout ah vannei zui semi-final an lut a, trophy an hnaih.
Kum liam ta Caraboa Cup final-ah Manchester United hneh lova vanduai, inelna neih mekah champion lai United hnawtchhuaktu Newcastle hian Stamford Bridge-a bul an tan tha a, goal an thun thuai. Minute 16-na lekah Callum Wilson chuan Chelsea defender tihsual vangin awlsam takin a pet goal a, hmahruaina goal a thun. Hma takah goal an thun vangin an phur a, kum zawnin semi-final luh theih beiseina sang tak an nei hman. Player thar thahnem tak la lut chunga manager thar Pochettino hnuaia beisei phak lo Chelsea in an si phurh sut tumin tan khawh chiam thin mah se an hlawhtling mai thei lo.
Blues hian an si phurh sut tumin tan an khawh char char a, hun pek belhah an vannei ta nge nge. Minute 90+2-ah Mykhailo Mudryk Newcastle tlarhnung chesual a hrem a, awlsam taka goal thunin an si phur a sut. Mudryk goal thun hnuin goal dang a luh belh thei tawh lova, penalty shoot out hmangin chak zawk zawn chhunzawm a ni.
Penalty shootout ah hian Chelsea tana pettu Cole Palmer, Conor Gallagher, Christopher Nkunku leh Mudryk ten an pet goal vek laiin Newcastle tana pet Kieran Tripper leh Matt Ritchie ten an pet goal lo thung a. Blues hian 4-2 a hnehna changin, semi-final an inhlangkai zui ta a ni. Caraboa Cup-ah hian Middlesbrough leh Everton ten semi-final an lut ve bawk a. Quarter-final hnuhnung berah Liverpool leh West Ham United in semi-final luh an inchuh ve bawk. Liverpool an pumpelh thei hlauh a nih chuan Chelsea tan final lut in, champion theihna hun remchang tak a inhawng ang.
Fulham an chak hram
Chelsea an bawkin Everton chuan an mikhual Fulham lakah si an phur hmasa a, hun tawp dawn an si phurh an sut. Penalty hmanga semi-final lut tur zawn a ni a, 7-6 a hnehna changin, Fulham in harsa takin semi-final an lut.
Goodison Park-a lenglut Fulham an vannei hmasa a, minute 41-naah Michael Keane own-goal hmangin hma an hruai. Si khat faiin hun rei tak chhung an hnufual hnuin minute 82-naah Everton tan Beto chuan goal thunin an si phurh a sut ta hlauh. 1-1 a nih hnuin goal dang a luh belh thei tawh lova, tie-break hmangin semi-final lut tur zawk zawn chhunzawm a ni. Penalty-ah hian Everton tana pettu hnuhnung Idrissa Gueye chuan goal post a pet per. Fulham tana pet hnuhnung ber Tosin Adarabioyo chuan goal pawimawh zet thunin a Fulham chuan 7-6 in hnehna an chang zui a, season 22 zet hnuah a vawi khat nan domestic semi-final an lut.
Boro an chak chiang
Thawleh zana Caraboa Cup quarter-final dangah EPL club ni lo club pahnih an inhmachhawn a. Championship club Middlesbrough chuan Mimuala an khingpui League One club Port Vale chu si thum faiin an hneh a, awlsam takin semi-final an lut.
Vale Park a lenglut Boro tan hian Jonathan Howson chuan minute 11-naah hmahruaina goal a thun a. Minute 23-naah Morgan Rogers-a’n an goal hnihna a thun hnuin Matt Crooks chuan minute 53-naah an goal thumna a thun zui leh bawk. Hun tawp thlengin goal dang a luh belh tawh lova, Boro chuan kum 2004 a an champion hnuin a vawi khat nan League Cup semi-final an lut ta a ni. Semi-final ah inlehthalna thlentir an tum zui ang.
Chelsea in semi-final an lut
