Princess of Wales, Kate Middleton chu a cancer enkawl nana chemotherapy treatment a lak zawh hnuah a vawi khat nan mipui hmuh turin khawlaiah a chhuak ve leh ta a, Pathianni kalta khan a pasal Prince William nen inkhawm turin car-in biak in an pan dun a ni.
Kate, kum 42, hian thlaruk val kalta khan cancer a neih thu a puang a, a inenkawl zui nghal char char a, chemoterapy a lak zawhna pawh kar hnih dawn a ni ve leh tawh a, tunah chuan a royal duty-te pawh a ti ve leh tan tawh a ni. Pathianni kalta khan Balmoral-a lal chhungkaw chenna bul, Scottish thingtlang khua Crathie-a Crathie Kirk biak ina inkhawm turin a pasal nen an kal a, kumin February thlaa a cancer tih an hriatchhuah ve tho, King Charles III leh a nupui Queen Camilla te pawh he biak inah hian an inkhawm ve bawk a ni.
A cancer tih an puan hnuah Kate-i hi mipui hmuh turin a chhuak tam tawh lo hle a, July thla khan a pasal William leh an fanu Princess Charlotte, kum 9, te nen Wimbledon men’s singles final an enho a, hetah hian mipui standing ovation an lo pe nghe nghe a ni.
Kate hian September ni 9 khan chemotherapy a lak zawh thu puangin, “Nipui a tawp dawn rual hian ka chemotherapy treatment kan zo ve ta hi a thawven huaina tham a ni. Tun thla 9 chhung chu kan chhungkaw tan hun harsa tak a ni. Kan hriat angin hringnun hi thawklehkhatah a inthlak thut thei a, tuifawn khauh tak leh kan la dai ngai loh kawng zawh te kan zir a ngai thin. Tunah chuan cancer free ni tura theihtawpa tan lak a tul ta. Chemotherapy kan zo tawh nain, damna tluantling nei tura ka kawng zawh tur hi a la thui a, nitin ka hmachhawn zel a ngai a ni,” a ti.
Kate chuan video statement siamin, “Cancer hmachhawn chu a khirh a, a rapthlak a, tute tan pawh hriatlawk lawk loh thil a ni deuh vek mai. Kan la suangtuah ngai reng reng loh, kan taksa derdep zia min hriatchhuah tir a, chu chuan thil engkimah thlirdan thar min neih tir a ni,” a ti bawk.
Chemotherapy a lak zawh hnua a vawi khat nan Kate Middleton mipui hmaah inlan
