Budget session kal mekah, nimin khan land revenue and settlement changtu minister B.Lalchhanzova putluh “The Indian Stamp (Mizoram Amendment) Bill, 2024” chu passed a ni a. He amendment bill hian stamp duty 1% lak thin chu 3% lak tawh tur, tiin a rawn thlak danglam ta a. Hei hi Act a nih a, hman a nih hnuah chuan, ram hralhtu leh a leitute indawrna atanga Mizoram sawrkara chhiah lut thei tur hi a lo berah kum tin cheng vaibelchhe 30 vel tling thei tura beisei a ni.
Mizoram hi India ram state zingah chhiah la tlem berte zinga mi kan ni awm e. Mipui aiawha roreltu ten rorelna inah chhiah lak chungchang an relin, mipui phurrit siamna anga sawi a ni thin a. Inthlan pui kan hmachhawn thinah pawh hian, mipui laka tlaktlum nan ‘chhiah lak loh’ hi kan sawimawi duh hle. Hei hi tunhma atanga kan lo tih than a nih avangin, chhiah lak lam rel hi chu a phurawm fahran thin lo niin a lang.
Kalphung thar intiam sawrkar a lo piang a, budget session neih hmasak berah 1% atanga 3%-a tih sanna tur chhiah lakna tur Bill a lut nghal rup mai a. Sawihonaah pawh a rate sanna per cent hian sawi a hlawh nghal hle a. Vawikhata zuang dawrh lo deuh hian 3% aia hniam ni se tih rawtna pawh hriattur a awm nawk a. State danga stamp duty lak a nih dan tarlan te pawh a ni a, a then chuan 8% te pawh an lo la a, 5% te, 6% te etc… a lo ni nawk hlawm bawk a. Han chhut chet chet hian, keini aia chhiah lo khawn tam zawkte hi keini aia dinhmun tha leh changkang zawk an ni deuh vek awm e.
Mizo mipuiah hian chhiah lak sawi apianga ngaihdan tha lo tak lo piang thin nia lang chu, ‘eiruk leh mai mai tur’ tih hi a ni awm e. Mipui hian chhiah an pek hi, dik takin hmasawnna hna thawhnan hman a ni tih an hmuh a, an hriatchian phawt chuan, phur takin chhiah hi an pe ang tih a rin ngam a. Hei hi tun sawrkar thar tan hian chona lian tak a ni dawn a ni.
Chhiah lak….
