Mizoram chhimlama kawlphetha pek kawnga harsatna hrang hrang leh a chinfel dan tur chu heng lai bialtu MLA ho leh Power & Electricity minister F Rodingliana hoin department official-te nen sawi a ni.
Tunhnaiah chhim lamah power supply a mumal lo hle a. Damdep khua leh a chhehvel phei chuan hun rei tak chhung power an hmu tawh lo tih sawi a ni.
P&E hotute chuan chhim lam chawmtu Khawiva leh Chawnhu bakah hmundanga harsatna hrang hrang an tawh dan an sawifiah a. He harsatna chingfel tura department hmalak dan leh thlen chin an sawifiah bawk.
Power minister chuan power-a intodelh tur leh mipuiin power tha taka an hmuh theihna turin sawrkarin hma a la chho zel tih a sawi a. Hemi kawngah bialtu MLA te nen an harsatna leh an ngaihpawimawh an sawiho theih avangin lawmthu a sawi a; eng hunah pawh inthlahrung lova an mamawh a hnenah emaw bialtu official te hnenah emaw thlen a, fin chhuah zel turin a ngen a ni.
Thutkhawmah hian Lawngtlai West bialtu MLA C Ngunlianchunga, Lawngtlai East bialtu MLA Dr Lorrain Lalpekliana Chinzah, Tuichawng bialtu MLA Rasik Mohan Chakma, West Tuipui bialtu MLA Prova Chakma leh Palak bialtu MLA K Hrahmo te an tel a. MLA-te hian an bial chhunga harsatna hrang hrang an sawi a ni.
Chhimlam power dinhmun sawipui
