Kolasib district-a MLA inthlan neih zawh tak thlirletin district election officer John LT Sanga hoin inthlan buaipuinaa hotute leh MJA Kolasib District an thukhawm a, inthlana thil chhinchhiah tlak leh chin zui zel atana tha tih te an sawikhawm.
Thil chhinchhiah tlak leh chin zui atana tha nia an hriatte an sawi a. Hmasawn theihna tur kawng hrang hrang sawi hoin, ngaihdan an thawhkhawm a. Ngaw leh nungcha lam hawi (forest theme) a chei unique polling station 5/26-Saidan P/S chuan hlut a hlawh hle tih te; intlar ngai loa vote thlak theihna atana ruahman 5/16-Project Veng leh 5/28-Project Veng-II P/S-ah inthlan a felfai zualin, chin zui zel atan a duhawm hle tih te sawi a ni a. District hmunpui atanga polling station hrang hranga thil thleng vil theihna tura 60% polling station webcasting tih leh vote thlak tura polling station pan harsatte tana home voting tih chu zawngchhang thlak hlea hriat a ni bawk.
DEO chuan Kolasib district-ah tluang taka inthlan zawhfel a ni chu lawmawm a tih thu a sawi a. Inthlan chu tihthan a awm lo a, chetsual palh theihna a tam a, chuti chunga felfai tak buatsaih theih a ni chu lawmawm a tih thu a sawi. Inthlan hlawhtling tak buatsaih theih chhan chu official-te, tlawmngai pawl, MPF, media, political party leh district mipui thawh hona vang a ni tiin, lawmthu a sawi a ni.
November 7-a vote thlakah khan Kolasib district-a vote awm zawng zawng 63456 (mipa 30595 leh hmeichhia 32861) atangin EVM hmangin vote 52637 (mipa 24954 leh hmeichhia 27683) a tla a, chu chu zaah 82.95 a ni. Hriat theih chinah Kolasib district-ah postal ballot-a vote tla 980 awmin, EVM vote tla nen belhkhawmin 53617 a ni a, hei hi vote awm thei zat (63456) atangin 84.49% a ni.
Chhinchhiah tlak leh chin zui atana tha sawikhawm
