September 7, Ningani khan Mizoram Premier League (MPL) 10 – round 4 khelh a ni a. Chhinga Veng FC (CVFC) leh Electric Veng FC (EVFC) ten hnehna changin, point thum an hmu.
MPL season thara bul tan tha lo, pasarihnaa awm mek Chhinga Veng FC chuan panganaa awm mek FC Venghnuai chu 1st Bn. MAP Ground-ah an hmachhawn a, si hnih faia hnehna changin, a khing-puite an lehpel.
Table-ah hmun sang zawk luah tura chak mamawh CVFC hian an khingpui FC Venghnuai lakah an khel tha viau a, chawlhlawk hmaa goal khat an thun bakah chawlhlawk hnu lamah goal khat an thun belh leh a, an mamawh point thum an hmu. CVFC tan hian minute 26-naah A Vanlalremruata chuan hmahruaina goal a thun a, he goal hmang hian si khat faia hmahruai chungin chawlhlawk an hmang.
Chawlhlawk hnu lamah CVFC an khel tha chhunzawm a, goal an thun belh bakah an goal an venghim tluan. Minute 69-naah Suanngaihmuana chuan an goal hnihna thunin an chakna a nem nghet. Hun tawp thlengin goal dang a luh belh tawh lova, CVFC chuan si hnih faia hnehna changin, table hnuai lam an chhuahsan.
FC Venghnuai laka hnehna chang Chhinga Veng FC hian khelh li atangin point li an hmu a, panganaah an insuan chho a. FC Venghnuai hian khelh li atangin point khat chiah an la hmu a, pasarihnaah an tla thla ve thung a, CVFC nen an dinhmun a inthlak thleng thawk.
Ningani vek khan khelh thum atanga point khat chauh la hmu team pahnih; Electric Veng FC leh Project Veng FC te an inhmachhawn a. EFC in 2-1 a hnehna an chan vangin table-ah hma an sawn hret a. Project Veng FC in table mawngphah an luah nghet ve thung a, insiamthat thuai an mamawh.
EFC leh PVFC ten inkhel hmuhnawm an lantir a, an inhnehtawk a, goal pawh a lut har dun hle. EVFC hmahruaina goal leh an chakna goal te hi first half tawp hma hun pek belh leh hun pangngai tawp hnu hun pek belha lut ve ve a ni. PVFC an hneh tum hian chak phuin an khel a, an vannei tel bawk tiin a sawi theih.
Inkhel hmuhnawm leh inhnehtawk takah hian goal a lut lawk thei lo va, chawlhlawk dawn hnaih minute 45+2-ah F. Lalrammuana chuan EFC hmahruaina goal a thun a, si khat faia hmahruai chungin chawlhlawk an hmang.t
Chawlhlawk hnu lamah Project Veng FC in goal an thun hmasa ve thung a, minute 72-naah penalty an hmu. He penalty hi Jehova Lalthangsanga’n a pet goal a, an si phurh a sut.
Goal khat ve ve an thun hnuin an inhnehtawk zui viau a, goal pawh a luh belh lawk thei lo. Hun pangngai tawp thlenga an inhnehtawk vangin chak zawk an awm thei dawn lo niin a lang hman a, hun pek belhah EFC an che fuh leh ta tlat thung. EFC tan hian minute 90+3-ah Thangrothuama chuan an chakna goal a thun.
Chhinga Veng leh Electric FC an chak
