Chhul hmawr cancer thlentu virus laka himna tur damdawi inpe tan

Chhul hmawr cancer thlentu virus
laka himna tur damdawi inpe tan
Chhul hmawr cancer thlentu Human Papilloma Virus (HPV) vaccine chu hmeichhe tleirawl kum 14-na hmang mekte tan sawrkar damdawi in hrang hranga a thlawna lak theih turin Prime minister Narendra Modi chuan Inrinni khan India ram pum huapin Ajmer Rajasthan atangin a tlangzarh a. Mizoram tana he vaccine tlangzarh inkhawm hi Civil Hospital Aizawlah Health & Family Welfare minister Lalrinpuii hoin hman a ni bawk.
Minister chuan Mizoram chu India state zinga mihring awm zat za zela chhutin cancer vei tamna ber a ni tih a sawi a. Mizo cancer veiten an pan nasat ber pawl Tata Memorial Hospital Mumbai-a an director pawhin Mizo zinga cancer vei an tam lutuk hi a vei a, zuk leh hmuam (vaihlo atanga siam) kan tih nasat vang leh kan nunphung leh ei leh in hrisel tawk loh vang a ni tih a hrilh thu a sawi. Mithiamten an zirchiannaa an hmuhchhuah chu, sarep, vawk thau leh tel tha lo kan ei tam leh zuk leh hmuam kan ti nasa chu cancer vei kan tam chhan nia sawi a nih thu a sawi bawk.
India rama hmeichhia cancer vei zingah hnute cancer a tam ber a, chhul hmawr cancer-in a dawt tih a sawi a. Chhul hmawr cancer zaa 99.7 chu HPV-in a thlen tih sawiin, HPV laka kan inven theihna tur vaccine a thlawna a lak theih ta chu lawmawm a tih thu a sawi. Hmeichhe tleirawl kum 14-na hmang mekte chu he vaccine hi la vek turin a chah a ni.
Chhul hmawr cancer hi hmeichhe natna bik a ni a, chhul hmawr cancer za zela 99.7 hi Human Papilloma Virus (HPV) in a thlen a ni. Kum 2024 khan India ramah chhul hmawr cancer vei thar mi 78499 an awm a, thihpui 42392 an awm.
HPV chi hrang zinga 17 chu cancer thlentu (high risk) bik nia hriat a ni a. Heng chi 17 zingah hian HPV 16 chu chhul hmawr cancer thlentu hlauhawm ber zing ami niin, khawvel puma chhul hmawr cancer zinga zaa 77 chu HPV 16 leh HPV 18 inkawpin a thlen a ni a, India ramah chuan chhul hmawr cancer zinga zaa 88 hi he virus hian a thlen a ni. HPV natna hi kawppuite hnenah kaichhawn a awlsam hle a, mipat hmeichhiatna, mipat mipatna leh oral sex atangin a inkaichhawn theih a ni.
Tunah hian khawvel pumah ram 160-ah HPV vaccine hi hman a ni tawh a. South East Asia Region (SEAR) a ram 10 zinga ram 8-ah HPV vaccine hi hman mek niin, India ramah chuan HPV vaccine hi private damdawi inah kum 2008 atang khan hman tan a ni tawh.
Vaccine la thei te chu, hmeichhia tleirawl kum 14-na hmang mek, kum 14 pum tawh kum 15 piancham la lawm lote an ni a. Sawrkar damdawi in hrang hrang – Health and Wellness Centre, Primary Health Centre, Community Health Centre, Sub-District Hospital, District Hospital ah lak theih a ni. Tun atanga thla thum chhungin he vaccine pek beihpui thlak phawt tur a ni a, a hnu ah chuan Sub Center-ah vaccine dang pek ruala pek theih tura ruahman a ni. Chutihrualin natna vei mek emaw natna benvawn nei, enkawl dam a nih hma chu vaccine pek theih an ni loa, vaccine a lak tawhah allergy nei emaw yeast allergy neite leh nau pai mekte pek loh tur a ni.
Aizawl bakah district thenkhatah Inrinni hian vaccine hi pek tan nghal a ni.