Chief minister-in FCAA a sawimawi tum luatah thalaite hmaah dawt sawi – MNF Legal Board

Chief minister-in FCAA a sawimawi
tum luatah thalaite hmaah dawt sawi
– MNF Legal Board
Chief minister-in Forest (Conservation) Amendment Act 2023 sawimawi a tum luatah YMA member kalkhawm hmaah pawh dawt a sawi hreh lo tih MNF party chuan an sawi.
MNF Legal Board vice chairman Lalpianfela Chawngthu chuan, YMA Inkhawmpui Lian vawi-75 na, Sakawrdai-a neih zawh takah October 22 zan vantlang inkhawmah chief minister Pu Lalduhoma’n thu a sawi tih sawiin, sawrkar laipuiin ram venhimna changchawia Mizoram chhung, a duhlai apianga hma a lak theihna tur chin, ramdang nena inrina atanga boruaka teha km. 100 chin tih FCAA 2023-a tarlan chu, km 10 chin chauh angin chief minister hian a sawi tih a sawi
“Hei mai hi duhtawk loin, sawrkar laipuiin sipaite bukhuarna tura ram hectare 10 chin, forest clearance buaipui ngai loa rawn luah theihna tur pawh Left Wing extremist-te awmna state chauh huam tur ang leh Mizoram huam ve lo angin a sawi bawk a. Left Wing extremist-te awmna state-a sipaite hmun khuar theihna tur hi chu a hranga tarlan niin, hectare 5 aia zau loah tih a ni zawk. Hetianga dawt chiang tak, thalai sang rual pungkhawmhmaa a sawi duh hi a zahthlak hle,” a ti.
2023 November 29-a guidelines chhuakah ram venhimna changchawia sawrkar laipuiin hma a lakna turah ‘state sawrkarah dil phawt tur a ni. State thuneihna a sang ta a ni’ tiin Pu Lalduhoma hian dawt bawk a sawi zawm niin MNF Legal Board hruaitu hian a sawi a. Guidelines-ah hian state sawrkarah dil tur tih reng reng a awm loa, thuneihna tawp chu sawrkar laipui kutah zel dah a ni, tiin, guidelines para 28-ah chuan sawkar laipuiin a tul ang zelin, state sawrkar hnenah hmalak dan tur a hriattir ang, tih tarlan a ni a. FCAA 2023 rules a ni emaw guidelines a ni emaw, thuneihna tawp chu sawrkar laipui kutah vek a awm tih a sawi a ni.
“Mizoram CM-in thalai rual kalkhawm zinga a duh duh, thu belhchian dawl lo thlenga a chhim thal bekang puah pui phawng phawng mai hi a zahthlak a. FCAA chungchang kher loah pawh a thusawi dangte han ngaihtuah vang vang hian, Mizo mipui, a bikin thalaite a zah lo hle tih a langchiang. Amah pawhin a hriatchian loh dan, kan rama hman a nih ve theihna tur official resolution Assembly House-ah a naute a pass pui ta mai hi a vanduaithlak hlein kan hria,” a ti.
FCAA duhlotute hmasawnna (develoment) duh ve lo hial anga inpuhna lek lek a awm mek tih Lalpianfela Chawngthu hian a sawi bawk a. FCAA Mizoram-in a pawm (adopt) hma khan tuna ram hmsawnna kan hmuh zawng zawng hi thawh a lo ni tawh tih sawiin, kan ram leh hnam himna hralh kher lo pawhin hmsawnna hna a thawh theih tih hre nawn turin Zoram mipui an chah tih a sawi.
CM chauhin a sawimawi, a minister-te leh MLA-te bakah ZPM party ngei pawhin a thatna sawi tur an hriat miah loh dodalna atana MNF-in October 29-a total bandh a huaihawt tur chu mipui zawng zawngin ram leh hnam tan a ni tih hria a, thlawpa tawiawm turin an sawm tih a sawi. Chutihrualin, sawrkar pawhin total bandh neih hma hun tlemte la awmah hian he dan, Assembly-in a lo pawm tawhna official resolution hnuhkir a nih leh theihnan Special Assembly kohna tichhuak turin an ngen nawn tih a sawi bawk.